प्रतिनिधी
पैलवान सुभाष दादा पाटील युथ फाउंडेशनच्या राष्ट्रीय पुरस्कार सोहळा २०२६ मध्ये ह.भ.प. श्री निरंजन महाराज कुंभार यांना ‘वारकरी भूषण पुरस्कार २०२६’ देऊन सन्मानित करण्यात आले. ही माहिती फाउंडेशनचे संस्थापक अध्यक्ष पैलवान सुभाष दादा पाटील यांनी दिली.
यावेळी बोलताना त्यांनी सांगितले की, ह.भ.प. निरंजन महाराज कुंभार हे व्यसनमुक्ती संघटना महाराष्ट्र राज्य, सांगली जिल्हाध्यक्ष म्हणून कार्यरत असून सामाजिक आणि आध्यात्मिक क्षेत्रात उल्लेखनीय योगदान देत आहेत. लहान वयातच त्यांनी वारकरी संप्रदायाचा स्वीकार केला असून वारकरी संस्कारांचा वारसा त्यांना त्यांच्या आई-वडिलांकडून लाभला आहे. त्यांचे आई-वडीलही वारकरी संप्रदायाचे निष्ठावान अनुयायी आहेत.
निरंजन महाराज यांनी संतवीर बंडातात्या कराडकर यांच्या सानिध्यात राहून वारकरी परंपरेचे ज्ञान आत्मसात केले आहे. ते एक कुशल मृदंगवादक असून कीर्तन, भजन आणि समाजप्रबोधनाच्या माध्यमातून वारकरी संप्रदायाच्या विचारांचा प्रचार-प्रसार करत आहेत.
वारकरी संप्रदायातील योगदान तसेच व्यसनमुक्ती अभियानातील कार्याची दखल घेत त्यांना हा प्रतिष्ठेचा पुरस्कार प्रदान करण्यात आला. उपस्थित मान्यवरांच्या हस्ते त्यांचा गौरव करण्यात आला.
या सोहळ्यास हिंदू रत्न ह.भ.प. शांताराम महाराज साळुंखे, हिंदू रत्न ह.भ.प. दिलीप महाराज पाटील, हिंदू रत्न ह.भ.प. किशोर महाराज जाधव, ह.भ.प. सुरेंद्रनाथ कणसे आणि ह.भ.प. सुधीर महाराज काले यांच्यासह वारकरी संप्रदायातील अनेक पदाधिकारी व वारकरी बांधव मोठ्या संख्येने उपस्थित होते.
पुरस्कार प्राप्त झाल्यानंतर व्यसनमुक्ती संघटना तसेच विविध सामाजिक आणि धार्मिक क्षेत्रातील मान्यवरांनी ह.भ.प. निरंजन महाराज कुंभार यांचे अभिनंदन करून पुढील कार्यासाठी शुभेच्छा दिल्या. त्यांच्या या सन्मानामुळे वारकरी संप्रदायात आनंदाचे वातावरण निर्माण झाले आहे.
