गागोदे खुर्द | प्रतिनिधी
रायगड जिल्ह्यातील पेण तालुक्यातील गागोदे खुर्द ग्रामपंचायतीच्या सार्वत्रिक निवडणूक २०२६ च्या सदस्य आरक्षण सोडतीसंदर्भात विशेष ग्रामसभा नुकतीच ग्रामपंचायत कार्यालयात संपन्न झाली.
महाराष्ट्र शासनाच्या आदेशानुसार आयोजित करण्यात आलेल्या या ग्रामसभेत ग्रामपंचायत सदस्य पदांच्या आरक्षण सोडतीची प्रक्रिया पार पडली. ग्रामविकास अधिकारी सौ. पुगावकर यांच्या उपस्थितीत ग्रामसभेचे आयोजन करण्यात आले होते.
ग्रामसभेची पूर्वसूचना ग्रामपंचायत कार्यालयाच्या नोटीस बोर्डावर, अधिकृत व्हॉट्सॲप समूहात तसेच गावातील विविध वाड्या-वस्त्यांमध्ये दवंडी देऊन ग्रामस्थांना देण्यात आली होती. त्यानुसार ग्रामस्थांनी उपस्थित राहून आरक्षण प्रक्रियेची माहिती घेतली.
यावेळी ग्रामपंचायत सार्वत्रिक निवडणूक २०२६ संदर्भातील विविध बाबींवर चर्चा करण्यात आली. आरक्षण सोडतीची प्रक्रिया पारदर्शक पद्धतीने पार पडल्याचे प्रशासनाकडून सांगण्यात आले.
सदर कार्यक्रमाबाबतची माहिती मा. तहसीलदार, पेण तसेच मा. गटविकास अधिकारी, पेण यांना सादर करण्यात आली होती. ग्रामस्थांच्या उपस्थितीत पार पडलेल्या या ग्रामसभेमुळे आगामी ग्रामपंचायत निवडणुकीच्या प्रक्रियेला अधिकृत सुरुवात झाल्याचे मानले जात आहे.
