अक्कलकोट | प्रतिनिधी
राष्ट्रसंत गाडगेबाबा यांच्या शतकोत्तर सुवर्णमहोत्सवी जयंती वर्षानिमित्त राज्यस्तरीय समितीची स्थापना करण्यात आली असून, या समितीच्या सहकार्यवाहपदी सामाजिक व शैक्षणिक क्षेत्रात उल्लेखनीय कार्य करणारे पोमू राठोड यांची निवड करण्यात आली आहे.
संत गाडगेबाबा शतकोत्तर सुवर्णमहोत्सवी जयंती वर्ष समारोह समितीच्या माध्यमातून राज्यभर विविध प्रबोधनपर उपक्रमांचे आयोजन करण्यात येणार आहे. या उपक्रमांचे प्रभावी नियोजन व अंमलबजावणी करण्यासाठी समिती कार्यरत असून, समिती प्रमुख डॉ. मुरहरी केळे यांच्या मार्गदर्शनाखाली गाडगेबाबांच्या विचारांचा प्रचार व प्रसार करण्यासाठी वर्षभर विविध कार्यक्रम राबविले जाणार आहेत.
या उपक्रमांतर्गत महाराष्ट्रातील विविध विभागांमध्ये दहा ‘संत गाडगेबाबा प्रबोधन परिषद’ आयोजित करण्यात येणार असून, त्यासोबत सामाजिक, शैक्षणिक, सांस्कृतिक आणि जनजागृतीपर कार्यक्रमांची विस्तृत मालिका राबविण्यात येणार आहे.
राष्ट्रसंत गाडगेबाबांनी स्वच्छता, शिक्षण, अंधश्रद्धा निर्मूलन, व्यसनमुक्ती, सामाजिक समता आणि मानवतेचा संदेश समाजापर्यंत पोहोचविला. त्यांच्या विचारांचा जागर समाजाच्या प्रत्येक स्तरापर्यंत पोहोचविण्याचा संकल्प समितीने केला आहे. याच पार्श्वभूमीवर पोमू राठोड यांनी शैक्षणिक व सामाजिक क्षेत्रात केलेले उल्लेखनीय कार्य, विविध प्रबोधनपर उपक्रमांतील सक्रिय सहभाग आणि समाजपरिवर्तनासाठीची सातत्यपूर्ण बांधिलकी लक्षात घेऊन त्यांच्यावर ही जबाबदारी सोपविण्यात आली आहे.
पोमू राठोड यांनी ग्रामीण व शैक्षणिक क्षेत्रात अनेक लोकाभिमुख उपक्रम राबविले आहेत. युवकांमध्ये सामाजिक जाणीव निर्माण करण्यासाठी त्यांनी सातत्याने प्रयत्न केले असून विविध सामाजिक प्रश्नांवर जनजागृती घडवून आणण्यात त्यांचे योगदान उल्लेखनीय मानले जाते.
त्यांच्या अनुभवाचा आणि कार्यक्षमतेचा लाभ समितीच्या राज्यव्यापी उपक्रमांना होईल, असा विश्वास समितीचे निमंत्रक सचिन पाटील यांनी व्यक्त केला आहे.
या निवडीबद्दल सामाजिक, शैक्षणिक आणि प्रबोधन क्षेत्रातील विविध मान्यवरांकडून पोमू राठोड यांचे अभिनंदन करण्यात येत असून, सर्वत्र आनंदाचे वातावरण निर्माण झाले आहे.
