पनवेल | प्रतिनिधी :
महाराष्ट्र नवनिर्माण सेनेचे अध्यक्ष Raj Thackeray यांच्या वाढदिवसानिमित्त रविवार, 14 जून 2026 रोजी पनवेल व नवीन पनवेल परिसरात मनसेच्या महिला आघाडीच्या वतीने वृक्षारोपण कार्यक्रम उत्साहात पार पडला. पनवेल महानगर महिला आघाडीच्या अध्यक्षा स्वरूपा सुर्वे यांच्या पुढाकाराने हा पर्यावरणपूरक उपक्रम राबविण्यात आला.
राज ठाकरे यांच्या वाढदिवसाचे औचित्य साधून पर्यावरण संवर्धनाचा संदेश देण्यासाठी विविध औषधी आणि पर्यावरणपूरक वृक्षांची लागवड करण्यात आली. यामध्ये कडूलिंब, जांभूळ यांसारख्या औषधी गुणधर्म असलेल्या वृक्षांचे रोपण करण्यात आले. वाढत्या प्रदूषणाच्या पार्श्वभूमीवर हरित पर्यावरण जपण्याचा संकल्प यावेळी करण्यात आला.
“झाडे लावा, पर्यावरण वाचवा” हा संदेश नागरिकांपर्यंत पोहोचविण्यासाठी आयोजित या उपक्रमातून वृक्षारोपणाचे महत्त्व अधोरेखित करण्यात आले. बदलते हवामान, वाढते तापमान आणि पर्यावरणीय असंतुलन यावर मात करण्यासाठी वृक्षसंवर्धन ही काळाची गरज असल्याचे मत उपस्थितांनी व्यक्त केले.
या कार्यक्रमास पनवेल महानगर सचिव आशिता पाटील, नवीन पनवेल सचिव मनीषा देशमुख, नवीन पनवेल उपशहर अध्यक्षा मानसी सकपाळ, उपशहर अध्यक्ष संदीप जाधव तसेच विभाग अध्यक्ष अंकुर पाटील यांच्यासह मनसेचे पदाधिकारी व कार्यकर्ते उपस्थित होते.
राज ठाकरे यांच्या वाढदिवसानिमित्त सामाजिक बांधिलकी जपत राबविण्यात आलेल्या या वृक्षारोपण उपक्रमाचे नागरिकांकडून स्वागत करण्यात आले असून, पर्यावरण संरक्षणासाठी अशा उपक्रमांची गरज असल्याची भावना व्यक्त करण्यात आली.
