शेगाव | प्रतिनिधी :
जगद्गुरू नरेंद्राचार्य महाराज संस्थानच्या अंधश्रद्धा निर्मूलन उपक्रमांतर्गत जगद्गुरू Narendraacharyaji Maharaj यांच्या समस्या मार्गदर्शन व दर्शन सोहळ्याचे आयोजन 14 व 15 जून 2026 रोजी शेगाव येथे करण्यात आले आहे. हा कार्यक्रम श्री गणेश प्रस्थ मंगल कार्यालय, एमएसईबी चौक, खामगाव रोड, शेगाव येथे सकाळी 9 वाजल्यापासून सुरू होणार असल्याची माहिती पश्चिम विदर्भ पीठ समितीच्या वतीने देण्यात आली.
पश्चिम विदर्भ पीठ प्रमुख कुंडलिकराव वायभासे, पीठ सहप्रमुख संजय खंडागळे, व्यवस्थापक सुरेश मोरे आणि प्रसिद्धी प्रमुख अमर इधोळ यांनी प्रसिद्धीपत्रकाद्वारे कार्यक्रमाची माहिती दिली.
संस्थानाच्या वतीने विविध सामाजिक, शैक्षणिक व सेवा उपक्रम सातत्याने राबविण्यात येत असून त्यामध्ये ग्रामस्वच्छता अभियान, इंग्रजी माध्यमांच्या मोफत शाळा, वेदपाठशाळा, रक्तदान शिबिरे, मोफत वैद्यकीय सेवा, मरणोत्तर देहदान जनजागृती, मोफत रुग्णवाहिका सेवा, महिला सक्षमीकरणासाठी शिलाई मशीन व घरघंटी वाटप, आपत्कालीन मदत उपक्रम तसेच कायदेविषयक साक्षरता शिबिरांचा समावेश आहे.
संस्थानाच्या माहितीनुसार, जानेवारी 2026 मध्ये आयोजित रक्तदान शिबिरांमधून अवघ्या 15 दिवसांत 1 लाख 71 हजार 150 रक्तपिशव्यांचे संकलन करण्यात आले. तसेच “एक पेड़ माँ के नाम” या अभियानांतर्गत नोव्हेंबर 2025 मध्ये 1 लाख 10 हजार 687 वृक्षांची लागवड करण्यात आली. डिसेंबर 2025 मध्ये 4 हजार 598 वनराई बंधारे उभारण्यात आले असल्याची माहिती देण्यात आली.
कार्यक्रमादरम्यान 14 जून रोजी साधक दीक्षा तर 15 जून रोजी उपासक दीक्षा कार्यक्रम आयोजित करण्यात आला आहे. इच्छुक भाविकांनी यासाठी नोंदणी करून लाभ घ्यावा, असे आवाहन करण्यात आले आहे.
या दोन दिवसीय सोहळ्यासाठी पश्चिम विदर्भातील सर्व जिल्ह्यांमधील पदाधिकारी, कार्यकर्ते, साधक, शिष्य आणि भाविक मोठ्या संख्येने उपस्थित राहणार असून, येणाऱ्या सर्व भाविकांसाठी दोन्ही दिवस महाप्रसादाची व्यवस्था करण्यात आली आहे.
जगद्गुरू नरेंद्राचार्यजींच्या प्रवचन, मार्गदर्शन आणि दर्शनाचा लाभ घेण्यासाठी भाविकांनी कुटुंबीय व मित्रपरिवारासह उपस्थित राहावे, असे आवाहन पश्चिम विदर्भ पीठ समिती आणि जिल्हा सेवा समितीच्या वतीने करण्यात आले आहे.
