महाबळेश्वर | प्रतिनिधी :
महाबळेश्वर हे देशातील प्रसिद्ध थंड हवेचे पर्यटनस्थळ असून दरवर्षी हजारो पर्यटक येथे भेट देतात. पर्यटन व्यवसायामुळे स्थानिक अर्थव्यवस्थेला मोठा आधार मिळत असला, तरी काही ठिकाणी निवासी घरांचा व्यावसायिक वापर होत असल्याच्या तक्रारी वाढू लागल्या आहेत.
स्थानिक नागरिकांच्या म्हणण्यानुसार, काही घरमालक स्वतः खालच्या मजल्यावर वास्तव्यास राहून वरचे मजले पर्यटकांना भाड्याने देत आहेत. मात्र, अशा ठिकाणी हॉटेल व्यवसायासाठी आवश्यक असलेले शासनाचे नियम व अटी पाळल्या जात नसल्याचा आरोप करण्यात येत आहे.
विशेषतः रात्री उशिरापर्यंत सुरू राहणाऱ्या पार्ट्या, मोठ्या आवाजातील संगीत, मद्यपान व इतर कार्यक्रमांमुळे परिसरातील नागरिकांना मोठा त्रास सहन करावा लागत असल्याचे सांगितले जात आहे. रात्री उशिरापर्यंत सुरू असलेल्या अशा उपक्रमांमुळे शेतकरी व कष्टकरी वर्गाच्या विश्रांतीत व्यत्यय येत असल्याची भावना स्थानिकांनी व्यक्त केली आहे.
स्थानिक नागरिकांनी प्रशासनाकडे मागणी करताना सांगितले की, निवासी इमारतींचा अनधिकृत व्यावसायिक वापर करणाऱ्यांवर योग्य ती कारवाई करण्यात यावी. तसेच पर्यटन व्यवसायासाठी लागू असलेल्या नियमांचे काटेकोर पालन व्हावे आणि रात्री उशिरापर्यंत सुरू राहणाऱ्या ध्वनिप्रदूषणाला आळा घालावा.
पर्यटन व्यवसाय आणि स्थानिक नागरिकांचे हित यामध्ये समतोल राखत प्रशासनाने आवश्यक ती पावले उचलावीत, अशी अपेक्षा नागरिकांकडून व्यक्त होत आहे.
