आजरा | प्रतिनिधी
स्टँड-अप कॉमेडी कार्यक्रमादरम्यान अॅनाटॉमी लॅबमधील मृतदेह आणि त्यांच्या अवयवांबाबत करण्यात आल्याचा दावा असलेल्या आक्षेपार्ह वक्तव्यावरून मेडिकल असोसिएशन ऑफ आजराने तीव्र नाराजी व्यक्त केली आहे. या प्रकरणामुळे देहदानासारख्या पवित्र सामाजिक उपक्रमाचा अवमान झाल्याची भावना व्यक्त करत संबंधितांवर नियमानुसार कारवाई करण्याची मागणी असोसिएशनने केली आहे.
असोसिएशनने प्रसिद्ध केलेल्या निवेदनात म्हटले आहे की, वैद्यकीय शिक्षणामध्ये शरीररचनाशास्त्राचा अभ्यास करण्यासाठी देहदान केलेले मृतदेह अत्यंत महत्त्वाची भूमिका बजावतात. समाजातील अनेक नागरिक मृत्यूनंतर आपले शरीर वैद्यकीय शिक्षणासाठी दान करून भावी डॉक्टर घडविण्यात मोलाचे योगदान देतात. या त्यागामुळेच विद्यार्थ्यांना मानवी शरीराचा सखोल अभ्यास करण्याची संधी उपलब्ध होते.
निवेदनात पुढे म्हटले आहे की, मृतदेह किंवा त्यांच्या अवयवांबाबत विनोदी किंवा विडंबनात्मक स्वरूपातील वक्तव्यांमुळे देहदानाबाबत समाजात चुकीचा संदेश जाऊ शकतो. त्यामुळे भविष्यात देहदान करण्यास इच्छुक असलेल्या नागरिकांच्या मनात संभ्रम निर्माण होण्याची शक्यता आहे.
मेडिकल असोसिएशन ऑफ आजराच्या पदाधिकाऱ्यांनी अभिव्यक्ती स्वातंत्र्याचा आदर राखत असतानाही देहदानाच्या माध्यमातून वैद्यकीय शिक्षणासाठी उपलब्ध होणाऱ्या मृतदेहांचा अवमान होणार नाही, याची काळजी घेणे आवश्यक असल्याचे मत व्यक्त केले आहे.
या घटनेमुळे वैद्यकीय क्षेत्रातील अनेक व्यक्तींनी नाराजी व्यक्त केली असून देहदान चळवळीचा सन्मान आणि सामाजिक जागरूकता कायम राखण्यासाठी संबंधित प्रकरणाची योग्य चौकशी करून आवश्यक ती कार्यवाही करावी, अशी मागणी करण्यात आली आहे.
