वणी | प्रतिनिधी
वणी परिसरात अमली पदार्थांविरोधात मोठी कारवाई करत स्थानिक गुन्हे शाखेच्या पथकाने एमडी (मेफेड्रोन) ड्रग्जची विक्री करणाऱ्या दोन इसमांना अटक केली आहे. या कारवाईत एमडी ड्रग्ज, मोबाईल फोन, दुचाकी आणि इतर साहित्य असा एकूण १ लाख ६३ हजार रुपयांचा मुद्देमाल जप्त करण्यात आला.
पोलिसांना मिळालेल्या गोपनीय माहितीनुसार संबंधित आरोपी एमडी ड्रग्जची विक्री करत असल्याचे समोर आले होते. त्यानुसार पोलिसांनी सापळा रचून दोन्ही संशयितांना ताब्यात घेतले. झडतीदरम्यान त्यांच्या ताब्यातून ५ ग्रॅम ९१ मिलिग्रॅम एमडी (मेफेड्रोन) हा अमली पदार्थ, मोबाईल फोन तसेच MH 29 CD 5776 क्रमांकाची दुचाकी जप्त करण्यात आली.
या प्रकरणी आरोपींविरुद्ध एनडीपीएस कायद्यान्वये गुन्हा दाखल करण्यात आला असून जप्त करण्यात आलेल्या अमली पदार्थांचा पुरवठा नेमका कुठून होत होता, याचा पुढील तपास पोलीस करत आहेत.
ही कारवाई यवतमाळ जिल्हा पोलीस अधीक्षक कुमार चिंता, अपर पोलीस अधीक्षक अशोक थोरात, स्थानिक गुन्हे शाखेचे पोलीस निरीक्षक सतीश चवरे आणि वणी पोलीस ठाण्याचे पोलीस निरीक्षक भानुदास पिदूरकर यांच्या मार्गदर्शनाखाली करण्यात आली.
कारवाईत सहाय्यक पोलीस निरीक्षक दत्ता पेंढारकर, पोलीस हेड कॉन्स्टेबल सुनील खंडागळे, सुधीर पांडे, पोलीस कॉन्स्टेबल सलमान शेख, रजनीकांत मडावी तसेच नरेश राऊत यांनी सहभाग घेतला.
अमली पदार्थांच्या अवैध व्यापाराविरोधात पोलीस प्रशासनाकडून सुरू असलेल्या मोहिमेअंतर्गत ही कारवाई महत्त्वाची मानली जात असून परिसरात तिचे स्वागत करण्यात येत आहे.
