बांबवडे | प्रतिनिधी
कोल्हापूर जिल्ह्यातील शाहूवाडी तालुक्याच्या औद्योगिक विकासाच्या दृष्टीने महत्त्वपूर्ण निर्णय घेण्यात आला असून प्रस्तावित औद्योगिक क्षेत्र उभारणीसाठी उच्चाधिकार समितीने मान्यता दिली आहे. या निर्णयानुसार तालुक्यातील विविध गावांमधील सुमारे २७३.३७ हेक्टर क्षेत्र औद्योगिकीकरणासाठी संपादित करण्यास मंजुरी देण्यात आली आहे.
प्रस्तावित औद्योगिक क्षेत्रासाठी मौजे आरूळ, आंबार्डे, करंजोशी, शित्तूर, तर्फे मलकापूर, बजागेवाडी, सावे आणि गोगवे या गावांतील जमिनींचा समावेश करण्यात आला आहे. या प्रकल्पामुळे शाहूवाडी तालुक्यात औद्योगिक गुंतवणुकीस चालना मिळण्याची अपेक्षा व्यक्त केली जात आहे.
औद्योगिक क्षेत्र विकसित झाल्यानंतर स्थानिक युवकांसाठी रोजगाराच्या नव्या संधी उपलब्ध होतील, तसेच परिसरातील रस्ते, वीज, पाणी आणि इतर पायाभूत सुविधांच्या विकासालाही गती मिळणार आहे. यामुळे तालुक्याच्या आर्थिक प्रगतीला चालना मिळण्यास मदत होणार आहे.
शाहूवाडी तालुक्याच्या औद्योगिक विकासासाठी हा निर्णय महत्त्वाचा टप्पा मानला जात असून भविष्यात कोल्हापूर जिल्ह्याच्या औद्योगिक नकाशावर आणखी एक सक्षम औद्योगिक केंद्र उभे राहण्याचा मार्ग मोकळा झाला आहे. स्थानिक स्तरावर या निर्णयाचे स्वागत करण्यात येत असून रोजगार व विकासाच्या नव्या आशा निर्माण झाल्या आहेत.
