बांबवडे प्रतिनिधी :
ग्रामीण भागातील मुलीही जिद्द, चिकाटी आणि कठोर परिश्रमाच्या जोरावर मोठे यश संपादन करू शकतात, हे बोरीवडे गावच्या कन्या डॉ. सुजाता पोपट पवार यांनी सिद्ध करून दाखवले आहे. मुंबईतील प्रसिद्ध जे. जे. रुग्णालयातून त्यांनी एमबीबीएस पदवी संपादन केली असून बोरीवडे गावातील पहिल्या महिला डॉक्टर होण्याचा मान मिळवला आहे. त्यांच्या या यशामुळे गावासह परिसरात आनंदाचे वातावरण निर्माण झाले आहे.
डॉ. सुजाता यांचे यश संघर्ष आणि मेहनतीची प्रेरणादायी कहाणी आहे. त्यांचे वडील पोपट आनंदा पवार यांनी पूर्वी पिग्मी एजंट म्हणून काम केले असून सध्या एमआयडीसीमध्ये कार्यरत आहेत. कुटुंबाच्या आर्थिक जबाबदाऱ्या सांभाळत त्यांनी मुलीच्या शिक्षणाला प्राधान्य दिले. वडिलांचे कष्ट, कुटुंबाचा पाठिंबा आणि सुजाता यांची अभ्यासातील सातत्यपूर्ण मेहनत यामुळे हे यश शक्य झाले.
डॉ. सुजाता पवार यांचे यश केवळ त्यांच्या कुटुंबासाठीच नव्हे, तर संपूर्ण बोरीवडे गावासाठी अभिमानाची बाब ठरली आहे. ग्रामीण भागातील विद्यार्थिनींसाठी त्यांचा प्रवास प्रेरणादायी असून उच्च शिक्षण आणि वैद्यकीय क्षेत्रातील करिअरसाठी नवी दिशा देणारा आहे.
त्यांच्या या उल्लेखनीय यशाबद्दल विविध क्षेत्रातील मान्यवर, ग्रामस्थ, मित्रपरिवार आणि नातेवाईकांकडून अभिनंदनाचा वर्षाव होत आहे. भविष्यात वैद्यकीय सेवेद्वारे समाजासाठी उल्लेखनीय कार्य घडावे, अशा शुभेच्छा व्यक्त केल्या जात आहेत.
