जामखेड | प्रतिनिधी :
अहमदाबाद (गुजरात) येथे ४ ते ८ जून २०२६ दरम्यान झालेल्या जागतिक योगासन क्रीडा अजिंक्यपद स्पर्धेत रौप्यपदक पटकावून देशासह अहिल्यानगर जिल्ह्याचे नाव उज्ज्वल करणाऱ्या जामखेड तालुक्यातील बावी येथील सीमा पवार यांचा विविध ठिकाणी सत्कार करण्यात आला.
बावी येथील श्री सिद्धनाथ मंदिर परिसरात आयोजित कार्यक्रमात त्यांचा गौरव करण्यात आला. तसेच चोंडी येथे विधान परिषदेचे सभापती प्रा. राम शिंदे यांच्या हस्ते शाल, श्रीफळ आणि पुष्पगुच्छ देऊन सीमा पवार यांचा सत्कार करण्यात आला.
यावेळी उपस्थित मान्यवरांनी सीमा पवार यांच्या उल्लेखनीय कामगिरीचे कौतुक करत त्यांच्या यशामुळे ग्रामीण भागातील तरुणींना प्रेरणा मिळत असल्याचे सांगितले.
सीमा पवार यांनी ‘सीनियर ए महिला’ गटातील ‘ट्विस्टिंग बॉडी’ प्रकारात भारताचे प्रतिनिधित्व करत रौप्यपदक पटकावले. या स्पर्धेत जगातील ७६ देशांतील खेळाडूंनी सहभाग नोंदविला होता. नोकरीची जबाबदारी सांभाळत सातत्यपूर्ण सराव, जिद्द आणि मेहनतीच्या बळावर त्यांनी हे यश संपादन केले आहे.
सीमा पवार या सध्या पुणे येथे वरिष्ठ सॉफ्टवेअर अभियंता म्हणून कार्यरत आहेत. यापूर्वी त्यांनी जिल्हास्तरीय व राज्यस्तरीय स्पर्धांमध्ये सुवर्णपदके, तसेच राष्ट्रीय स्पर्धेत रौप्यपदक मिळवत आपली गुणवत्ता सिद्ध केली आहे.
त्यांच्या या यशाबद्दल ग्रामस्थ, नातेवाईक आणि विविध क्षेत्रातील मान्यवरांकडून अभिनंदनाचा वर्षाव होत आहे. कार्यक्रमास पत्रकार श्वेता गायकवाड, धनसिंग साळुंके, अमृत कारंडे, गावचे सरपंच, उपसरपंच, चेअरमन तसेच ग्रामस्थ मोठ्या संख्येने उपस्थित होते.
