कडेगाव | वार्ताहर
आंबेगाव (ता. कडेगाव) येथून शेतकऱ्याचा टेम्पो चोरी करणाऱ्या सराईत चोरट्याला चिंचणी वांगी पोलिसांनी अटक करून चोरीचा टेम्पो हस्तगत केला आहे. या कारवाईत सुमारे १ लाख ९० हजार रुपये किमतीचा मुद्देमाल जप्त करण्यात आला आहे.
पोलिसांनी दिलेल्या माहितीनुसार, मोहसीन जैनुद्दीन शेख (मूळ रा. भाळवणी, सध्या रा. विटा) असे अटक करण्यात आलेल्या संशयिताचे नाव आहे. आंबेगाव येथील नवनाथ अंकुश साळुंखे (वय २८) यांचा टेम्पो १ ते २ जून दरम्यान अज्ञात चोरट्याने चोरून नेला होता. याप्रकरणी चिंचणी वांगी पोलीस ठाण्यात गुन्हा दाखल करण्यात आला होता.
गुन्ह्याचा तपास सुरू असताना पोलीस हवालदार विनायक सावळगे यांना गोपनीय बातमीदारामार्फत माहिती मिळाली की, चोरीचा टेम्पो विक्रीसाठी कडेपूरमार्गे सांगली येथे नेण्यात येणार आहे. या माहितीच्या आधारे पोलिसांनी कडेपूर-सांगली मार्गावर नाकाबंदी करून सापळा रचला.
नाकाबंदी दरम्यान संशयिताला ताब्यात घेण्यात आले. चौकशीदरम्यान त्याने टेम्पो चोरीची कबुली दिली. त्यानंतर पोलिसांनी चोरीचा १ लाख ९० हजार रुपये किमतीचा टेम्पो जप्त केला.
या यशस्वी कारवाईमुळे चोरीचा गुन्हा उघडकीस आला असून आरोपीला न्यायालयासमोर हजर करून जेलमध्ये पाठविण्यात आले आहे. चिंचणी वांगी पोलिसांच्या या तत्पर कारवाईचे परिसरातून कौतुक होत आहे.
