शहादा | प्रतिनिधी
शहादा एस.टी. डेपोतील मनमानी कारभार आणि कर्मचाऱ्यांच्या कथित मुजोरीचा प्रकार पुन्हा एकदा समोर आला आहे. शहादा-नाशिक बस तब्बल दीड तास उशिराने सुटल्याने प्रवाशांना भर उन्हात प्रतीक्षा करावी लागली. त्यातच एका ७५ वर्षीय वयोवृद्ध प्रवाशाला बसमधून उतरवून वाहकाने गैरवर्तन केल्याचा आरोप करण्यात आला असून, या घटनेमुळे प्रवाशांमध्ये तीव्र संताप व्यक्त होत आहे.
मिळालेल्या माहितीनुसार, रविवारी दुपारी शहादा-नाशिक बस उशिराने येत असल्याने प्रवासी डेपोमध्ये प्रतीक्षा करत होते. यावेळी डेपोतील एका कर्मचाऱ्याच्या सूचनेनुसार एक वयोवृद्ध प्रवासी बसमध्ये जाऊन बसले. मात्र काही वेळानंतर आलेल्या भावसार नावाच्या वाहकाने बस आरक्षित असल्याचे सांगत संबंधित वृद्ध प्रवाशाला खाली उतरवण्यास सांगितले.
प्रत्यक्षदर्शींच्या म्हणण्यानुसार, वाहकाने प्रवाशाशी उद्धट भाषेत संवाद साधला. वृद्ध प्रवाशाच्या नातेवाईकांनी विनंती करूनही त्याने भूमिका बदलली नाही. यामुळे दोन्ही बाजूंमध्ये शाब्दिक वाद निर्माण झाला. यावेळी वाहकाने “तुम्हाला या गाडीत बसू देणार नाही” अशा स्वरूपाची भाषा वापरल्याचा आरोप करण्यात आला आहे.
घटनेची माहिती मिळताच पाटील नावाचे अधिकारी घटनास्थळी पोहोचले. त्यांनी मध्यस्थी करण्याचा प्रयत्न केला. मात्र वाद अधिकच वाढल्याचे सांगण्यात येत आहे. दरम्यान, या घटनेची माहिती अखिल भारतीय ग्राहक पंचायतीच्या पदाधिकाऱ्यांना देण्यात आली. त्यानंतर तालुकाध्यक्ष अनिल भामरे, नगरसेवक ललित छाजेड आणि जयेश जैन यांनी डेपोमध्ये जाऊन संबंधितांची भेट घेतली.
तक्रारदारांच्या म्हणण्यानुसार, त्यावेळी डेपोमध्ये जबाबदार अधिकारी उपस्थित नव्हते. आगारप्रमुखांशी संपर्क साधल्यानंतर त्यांनी दुसऱ्या दिवशी येण्याचा सल्ला दिल्याचा आरोप करण्यात आला आहे. त्यामुळे प्रवाशांमध्ये नाराजीचे वातावरण निर्माण झाले.
या प्रकरणी संबंधित वाहक आणि प्रशासनाविरोधात डेपोमध्ये लेखी तक्रार दाखल करण्यात आली असून, वरिष्ठ स्तरावरही तक्रार करण्यात येणार असल्याचे ग्राहक पंचायतीच्या पदाधिकाऱ्यांनी सांगितले. दरम्यान, या प्रकरणामुळे एस.टी. महामंडळाच्या प्रवासी सेवांबाबत पुन्हा प्रश्नचिन्ह निर्माण झाले असून, संबंधित घटनेची चौकशी करून योग्य ती कारवाई करण्याची मागणी प्रवाशांकडून होत आहे.
