शहादा | प्रतिनिधी
नवीन शैक्षणिक वर्षाच्या पहिल्याच दिवशी शहादा नगरपालिका संचलित पीएमश्री म्युनिसीपल न्यू इंग्लिश स्कूल व कनिष्ठ विज्ञान, कला महाविद्यालय येथे ‘नवीन प्रवेश उत्सव’ मोठ्या उत्साहात आणि आनंददायी वातावरणात साजरा करण्यात आला. विद्यार्थ्यांचे स्वागत करून त्यांच्यात शिक्षणाविषयी आत्मीयता आणि उत्साह निर्माण करणे हा या उपक्रमाचा मुख्य उद्देश होता.
प्रवेशोत्सवानिमित्त शाळा परिसर फुगे, रंगीबेरंगी रांगोळ्या आणि आकर्षक सजावटीने नटविण्यात आला होता. शाळेच्या प्रवेशद्वारावर ढोल-ताशांच्या गजरात नवागत विद्यार्थ्यांचे जल्लोषात स्वागत करण्यात आले.
यावेळी समाजसेवक डॉ. चंद्रभान कदम, शालेय व्यवस्थापन समितीचे अध्यक्ष प्रदीप खर्डे, शाळेचे प्राचार्य आर. पी. वसावे आणि पर्यवेक्षक एस. पी. वळवी यांच्या हस्ते विद्यार्थ्यांना गुलाबपुष्प देऊन स्वागत करण्यात आले.
या विशेष कार्यक्रमात शाळेतील सर्व नवीन व जुन्या विद्यार्थ्यांना शासनाच्या मोफत पाठ्यपुस्तक योजनेअंतर्गत पुस्तके तसेच नवीन शालेय गणवेशांचे वाटप करण्यात आले. नवीन पुस्तके आणि गणवेश मिळाल्याने विद्यार्थ्यांच्या चेहऱ्यावर आनंद झळकत होता.
कार्यक्रमाच्या प्रमुख पाहुण्या म्हणून नगरपालिकेच्या शिक्षण व क्रीडा सभापती सौ. भावना कदम उपस्थित होत्या. यावेळी मार्गदर्शन करताना त्यांनी विद्यार्थ्यांनी नियमित शाळेत उपस्थित राहून ज्ञानार्जन करावे आणि गुणवत्तापूर्ण शिक्षणाच्या माध्यमातून उज्ज्वल भविष्य घडवावे, असे आवाहन केले.
प्राचार्य आर. पी. वसावे यांनी नवागत विद्यार्थ्यांचे व पालकांचे स्वागत करत सर्व विद्यार्थ्यांना नवीन शैक्षणिक वर्षासाठी शुभेच्छा दिल्या. कार्यक्रमाच्या यशस्वी आयोजनासाठी शिक्षक व शिक्षकेतर कर्मचाऱ्यांनी विशेष परिश्रम घेतले.
कार्यक्रमाच्या शेवटी विद्यार्थ्यांना शालेय पोषण आहाराचे वितरण करण्यात आले. उत्साहपूर्ण वातावरणात संपन्न झालेल्या या प्रवेशोत्सवामुळे पालिकेच्या पीएमश्री शाळेचे परिसरात कौतुक होत आहे.
