शहादा | प्रतिनिधी
“गावात मराठी शाळा टिकली तर भाषा टिकेल आणि भाषा टिकेल तरच आपली संस्कृती टिकेल,” या विचारातून मोहिदे (ता. शहादा) येथील जिल्हा परिषद मराठी शाळेचा संपूर्ण कायापालट करण्यात आला असून, नव्या शैक्षणिक वर्षाच्या पहिल्याच दिवशी विद्यार्थ्यांचे उत्साहात स्वागत करण्यात आले.
गावातील लोकप्रतिनिधी, सामाजिक कार्यकर्ते आणि ग्रामस्थांच्या संयुक्त प्रयत्नातून शाळेचे नूतनीकरण करण्यात आले आहे. नव्या रूपात सजलेल्या शाळेमुळे विद्यार्थी, पालक आणि ग्रामस्थांमध्ये आनंदाचे वातावरण निर्माण झाले आहे.
गावातील अनेक पिढ्यांचे शिक्षण या शाळेत झाले असल्याने शाळेशी गावकऱ्यांचे भावनिक नाते आहे. शाळेचे जीर्ण झालेले छत, खराब झालेल्या भिंती आणि इमारतीची दुरवस्था दूर करून तिला आकर्षक व आधुनिक स्वरूप देण्यात आले आहे.
चेतन पाटील यांच्या संकल्पनेतून आणि सरपंच सौ. श्रद्धाताई पाटील यांच्या पुढाकाराने हा उपक्रम साकार झाला. आमदार राजेशदादा पाडवी यांच्या मार्गदर्शनाखाली शाळेच्या विकासासाठी विविध कामे करण्यात आली.
सामाजिक कार्यकर्ते भाऊभाई पाटील, प्रकाश तुकाराम पाटील, विजू आण्णा, जाधव बापू, चेतन पाटील आणि युवराज नत्थू भिल यांच्या अथक परिश्रमातून शाळेचे रूप पालटले आहे. विशेषतः युवराज भिल यांनी रात्रंदिवस मेहनत घेत शाळेच्या सुशोभीकरणात महत्त्वाची भूमिका बजावली.
नवीन शैक्षणिक वर्षाच्या पहिल्या दिवशी नवप्रवेशित विद्यार्थ्यांचे पुष्पगुच्छ देऊन स्वागत करण्यात आले. विद्यार्थ्यांना नियमित शाळेत येण्यासाठी प्रोत्साहित करण्यात आले तसेच शिक्षणाचे महत्त्वही पटवून देण्यात आले.
या कार्यक्रमास सामाजिक कार्यकर्ते भाऊभाई पाटील, प्रकाश पाटील, पुरुषोत्तम आण्णा (विजू आण्णा), जाधव बापू, माजी ग्रामपंचायत सदस्य ईश्वरभाऊ महिरे, प्रकाशभाऊ गिरासे, मुन्नाभाऊ, युवराज भिल, अंगणवाडी सेविका, मुख्याध्यापिका आणि शिक्षकवृंद मोठ्या संख्येने उपस्थित होते.
यावेळी ईश्वरभाऊ महिरे यांनी सांगितले की, “मोहिदे गावच्या शाळेचा कायापालट करण्यासाठी प्रत्यक्ष आणि अप्रत्यक्षपणे योगदान देणाऱ्या सर्वांचे मनःपूर्वक आभार. गावकऱ्यांच्या एकजुटीमुळेच मायमराठीचे संवर्धन करणारी ही शाळा नव्या वैभवाने उभी राहिली आहे.”
शाळेच्या नव्या रूपामुळे विद्यार्थ्यांमध्ये शिक्षणाबद्दल उत्साह निर्माण झाला असून, ग्रामीण भागातील मराठी शाळांच्या जतन व संवर्धनासाठी हा उपक्रम प्रेरणादायी ठरत आहे.
