शहादा | प्रतिनिधी
नवीन शैक्षणिक वर्षाच्या पहिल्याच दिवशी विद्यार्थ्यांमध्ये शिक्षणाबद्दल उत्साह निर्माण करण्यासाठी शहादा येथील नामांकित व्हॉलंटरी प्राथमिक, माध्यमिक व उच्च माध्यमिक शाळेत प्रवेशोत्सव मोठ्या उत्साहात साजरा करण्यात आला. विविध नाविन्यपूर्ण उपक्रमांच्या माध्यमातून नवागत व जुन्या विद्यार्थ्यांचे स्वागत करण्यात आले.
या कार्यक्रमाच्या अध्यक्षस्थानी महाराष्ट्र राज्य बाल हक्क व सुरक्षा आयोगाचे अध्यक्ष ॲड. संजय पुराणिक होते. प्रमुख पाहुणे म्हणून ॲड. स्मिता जैन, ॲड. राजेश कुलकर्णी, प्रविणा कुलकर्णी, ताराबाई बेलदार, मुख्याध्यापिका प्रतिभा बोरसे, प्राचार्या नयना पाटील आणि विद्या बोरसे उपस्थित होत्या.
यावेळी मार्गदर्शन करताना ॲड. संजय पुराणिक यांनी शिक्षणासोबतच मूल्यसंस्कारांचे महत्त्व अधोरेखित केले. “शिक्षण हे केवळ पुस्तकी ज्ञानापुरते मर्यादित नसून विद्यार्थ्यांमध्ये प्रामाणिकपणा, जबाबदारी, करुणा, आदर आणि समतेसारखे गुण विकसित होणे आवश्यक आहे,” असे ते म्हणाले.
प्रवेशोत्सवानिमित्त शाळा परिसर रंगीबेरंगी फुगे, फुले आणि तोरणांनी सजविण्यात आला होता. पारंपरिक पद्धतीने गुढी उभारून नवीन शैक्षणिक वर्षाचे स्वागत करण्यात आले. विद्यार्थ्यांना पुष्पगुच्छ, पुस्तके आणि शैक्षणिक साहित्य देऊन त्यांचे स्वागत करण्यात आले.
विद्यार्थ्यांना पहिल्याच दिवशी दप्तराचे ओझे न वाटता आनंददायी शिक्षणाचा अनुभव मिळावा यासाठी इंग्रजी, मराठी, गणित, इतिहास आणि भूगोल विषयांचे आकर्षक स्टॉल्स उभारण्यात आले होते. खेळ, प्रात्यक्षिके आणि संवादात्मक उपक्रमांच्या माध्यमातून विद्यार्थ्यांना विविध विषयांची ओळख करून देण्यात आली. या उपक्रमांना विद्यार्थ्यांचा उत्स्फूर्त प्रतिसाद लाभला.
कार्यक्रमाचे सूत्रसंचालन सुनिता पाटील यांनी केले, तर ललिता राठोड यांनी उपस्थितांचे आभार मानले. कार्यक्रमाच्या यशस्वी आयोजनासाठी शाळेतील शिक्षक व शिक्षकेतर कर्मचाऱ्यांनी विशेष परिश्रम घेतले.
नवीन शैक्षणिक वर्षाच्या सुरुवातीलाच आयोजित करण्यात आलेल्या या अभिनव प्रवेशोत्सवामुळे विद्यार्थी, पालक आणि उपस्थित मान्यवरांमध्ये उत्साहाचे वातावरण निर्माण झाले.
