वाई प्रतिनिधी :
पीपल्स रिपब्लिकन पार्टीच्या वतीने 17 जून रोजी धोम पाटबंधारे विभागाचे उपविभागीय अधिकारी तसेच वाई प्रांताधिकारी यांची भेट घेऊन निवेदन सादर करण्यात आले. सर्वे नंबर 158/1, मिथिला नगर, वाई येथे धोम पाटबंधारे विभागाच्या जागेवर अतिक्रमण करून बेकायदेशीरपणे उभारण्यात आलेला सफेद बंगला तात्काळ जमीनदोस्त करण्यात यावा, अशी मागणी निवेदनाद्वारे करण्यात आली.
पीपल्स रिपब्लिकन पार्टीने दिलेल्या माहितीनुसार संबंधित बंगला एका शासकीय अधिकाऱ्याने अतिक्रमण करून बांधल्याचा आरोप करण्यात आला आहे. अतिक्रमण व अनधिकृत बांधकाम हा फौजदारी गुन्हा असल्याने संबंधितांवर तात्काळ गुन्हा दाखल करावा, तसेच पाटबंधारे विभागाची जागा अतिक्रमणमुक्त करण्यात यावी, अशी मागणी करण्यात आली.
तसेच पदाचा गैरवापर करून अतिक्रमण करणाऱ्या अधिकाऱ्यावरही योग्य शासकीय कारवाई करण्यात यावी, असे निवेदनात नमूद करण्यात आले आहे.
या प्रकरणात प्रशासनाने तात्काळ कारवाई न केल्यास पीपल्स रिपब्लिकन पार्टीच्या वतीने बेमुदत आंदोलन छेडण्यात येईल, असा इशारा सातारा जिल्हा महासचिव प्रणित मोरे यांनी दिला आहे. आंदोलनावेळी उद्भवणाऱ्या परिस्थितीस प्रशासन जबाबदार राहील, असेही त्यांनी स्पष्ट केले.
निवेदन देताना राष्ट्रीय मजदूर सेनेचे सातारा जिल्हा संघटक विकास जाधव, वाई तालुका अध्यक्ष विजय सातपुते, युवक कार्याध्यक्ष आकाश गायकवाड, युवक तालुका उपाध्यक्ष रोहित कवळे, युवक तालुका महासचिव सलमान पटेल, शहराध्यक्ष रणवीर परदेशी यांच्यासह कार्यकर्ते उपस्थित होते.
