उमरगा प्रतिनिधी : जिल्हा परिषद प्राथमिक शाळा, येणेगुर येथे नवीन शैक्षणिक वर्षाच्या पहिल्या दिवशी नवोदित विद्यार्थ्यांचे उत्साहपूर्ण वातावरणात स्वागत करण्यात आले. दोन महिन्यांच्या उन्हाळी सुट्टीनंतर शाळा सुरू झाल्याने परिसर चिमुकल्यांच्या किलबिलाटाने गजबजून गेला होता.
शाळेच्या पहिल्या दिवशी विद्यार्थ्यांच्या स्वागतासाठी संपूर्ण परिसर आकर्षक पद्धतीने सजविण्यात आला होता. सकाळी साडेआठ वाजता शिक्षक, ग्रामस्थ आणि पालकांच्या उपस्थितीत विद्यार्थ्यांची प्रभात फेरी व स्वागत रॅली काढण्यात आली. शाळेच्या प्रवेशद्वारावर शिक्षिकांनी नवीन विद्यार्थ्यांचे औक्षण करून गुलाबपुष्प व पेढे देत स्वागत केले.
स्वागत समारंभात पहिलीच्या विद्यार्थ्यांना शासनाकडून मिळणारी नवीन पाठ्यपुस्तके व शालेय साहित्याचे वाटप करण्यात आले. तसेच शालेय व्यवस्थापन समितीच्या वतीने सर्व विद्यार्थ्यांना गोड खाऊ देण्यात आला. नवीन पुस्तके मिळाल्याने विद्यार्थ्यांच्या चेहऱ्यावर आनंद दिसून येत होता.
या कार्यक्रमाला पंचायत समिती सदस्या लक्ष्मी काकू, शालेय व्यवस्थापन समितीचे अध्यक्ष ज्ञानेश्वर माने, स्थानिक लोकप्रतिनिधी सागर पाटील, पालक मुख्तार मुल्ला, दिलीप गायकवाड, इस्माईल मुल्ला, नितीन व्हनाळे तसेच इतर पालक उपस्थित होते. शाळेचे मुख्याध्यापक कांबळे गुरुजी व शिक्षकवृंद यांनी विद्यार्थ्यांचे स्वागत केले.
यावेळी मान्यवरांनी विद्यार्थ्यांना नवीन शैक्षणिक वर्षासाठी शुभेच्छा दिल्या. मुख्याध्यापकांनी शाळेत वर्षभर राबविण्यात येणाऱ्या विविध उपक्रमांची माहिती देत विद्यार्थ्यांनी नियमित उपस्थित राहण्याचे आवाहन केले.
कार्यक्रमाचे आभार अंबुसे गुरुजी यांनी मानले. पहिल्याच दिवशी झालेल्या या जंगी स्वागतामुळे विद्यार्थ्यांचा शाळेतील पहिला दिवस संस्मरणीय ठरला.
