शहाद्यात ‘वीर शिरोमणी महाराणा प्रतापसिंह की जय’च्या घोषणांनी शहर दुमदुमले; भव्य जयंती मिरवणूक उत्साहात संपन्न

शहादा, दि. 17 (प्रतिनिधी)

शौर्य, स्वाभिमान आणि देशभक्तीचे प्रतीक वीर शिरोमणी महाराणा प्रताप सिंह यांच्या जयंतीनिमित्त शहादा शहरात भव्य आणि उत्साहपूर्ण मिरवणूक मोठ्या जल्लोषात पार पडली. ‘वीर शिरोमणी महाराणा प्रतापसिंह की जय’च्या घोषणांनी संपूर्ण शहर दुमदुमून गेले.

शहादा तालुका श्री क्षत्रिय राजपूत समाज मंडळ आणि जयंती उत्सव समितीच्या वतीने आयोजित या सोहळ्यात विविध क्षेत्रातील मान्यवर, लोकप्रतिनिधी आणि मोठ्या संख्येने समाजबांधव सहभागी झाले होते. कार्यक्रम अत्यंत शिस्तबद्ध आणि शांततेत पार पडल्याचे आयोजकांनी सांगितले.

सकाळी स्वामी समर्थ चौकालगत असलेल्या महाराणा प्रताप स्मारक स्थळी समाज पदाधिकाऱ्यांनी प्रतिमेला पुष्पहार अर्पण करून अभिवादन केले. त्यानंतर दुपारी मान्यवरांनी स्मारकस्थळी पुष्पांजली अर्पण केली.

सायंकाळी आमदार राजेश पाडवी यांच्या हस्ते सजवलेल्या ट्रॅक्टर ट्रॉलीवरील प्रतिमेचे पूजन करून भव्य मिरवणुकीला सुरुवात झाली. मिरवणुकीदरम्यान भगवे झेंडे, आकर्षक सजावट आणि ढोल-ताशांच्या गजरात तरुणाईचा उत्साह ओसंडून वाहत होता.

मिरवणूक बाजारपेठेतून जात असताना ‘महाराणा प्रताप की जय’ आणि ‘छत्रपती शिवाजी महाराज की जय’ अशा घोषणांनी वातावरण भारावून गेले. संपूर्ण शहरात भगवे झेंडे, फलक आणि तोरणे लावून उत्सवमय वातावरण निर्माण करण्यात आले होते.

या कार्यक्रमास प्रा. मकरंद पाटील, डॉ. कांतीलाल टाटिया, अजय शर्मा, जयपालसिंह रावल, ॲड. सुवर्णसिंग गिरासे, प्रीती पाटील, प्रा. संजय जाधव, नगरसेवक ज्ञानेश्वर चौधरी यांच्यासह अनेक मान्यवर उपस्थित होते.

मिरवणूक शांततेत पार पाडण्यासाठी पोलीस प्रशासनाने कडेकोट बंदोबस्त ठेवला होता. स्वच्छता विभागाने मिरवणूक मार्गाची विशेष साफसफाई केली होती, तर शहरात आकर्षक विद्युत रोषणाई करण्यात आली होती.

कार्यक्रमाचे प्रास्ताविक व आभार शहादा तालुका राजपूत समाज मंडळाचे अध्यक्ष संजय राजपूत यांनी मानले. जयंती उत्सव समितीच्या पदाधिकाऱ्यांच्या परिश्रमामुळे हा सोहळा यशस्वीरीत्या पार पडल्याचे सांगण्यात आले.