पालघर, दि. 18 :
आज सकाळी ७:२१ वाजता सफाळे स्थानकावरून डहाणू दिशेने जाणाऱ्या लोकलमधून एक प्रवासी पडून गंभीर जखमी झाल्याची घटना घडली. अपघातात जखमी व्यक्तीच्या तोंडातून रक्तस्त्राव होत असल्याची माहिती मिळाली.
घटनेनंतर उपस्थित प्रवाशांनी तातडीने स्टेशन मास्टरशी फोनद्वारे संपर्क साधण्याचा प्रयत्न केला, मात्र त्यांना कोणताही प्रतिसाद मिळाला नाही. त्यानंतर काही प्रवाशांनी स्वतः स्टेशनवर जाऊन घटनेची माहिती दिली.
गंभीर अपघात असूनही सकाळी सुमारे ८ वाजेपर्यंत घटनास्थळी कोणतेही रेल्वे अधिकारी, रेल्वे पोलीस किंवा संबंधित कर्मचारी उपस्थित नसल्याचा आरोप प्रवाशांनी केला आहे. त्यामुळे मदत कार्यास विलंब झाल्याने संताप व्यक्त करण्यात आला.
अखेर ७:५५ वाजता आलेल्या डोंबिवली–बोईसर मेमू लोकलला प्रवाशांनी ट्रॅकवर उतरून थांबविल्यानंतर स्टेशन मास्टर घटनास्थळी पोहोचले, अशी माहिती समोर आली आहे.
या संपूर्ण प्रकारामुळे रेल्वे प्रशासनाच्या आपत्कालीन प्रतिसाद व्यवस्थेवर गंभीर प्रश्न उपस्थित झाले आहेत. वेळेत मदत मिळाली नसती तर जखमी प्रवाशाचा जीव धोक्यात आला असता, अशा प्रतिक्रिया उपस्थित नागरिकांकडून व्यक्त करण्यात आल्या असून जबाबदारी निश्चित करण्याची मागणीही करण्यात आली आहे.
