दिनांक : १८ जून २०२६ | दापोली प्रतिनिधी
दापोली : दापोली-खेड मार्गावरील नारगोली परिसरात गुरुवारी सकाळी महाराष्ट्र राज्य परिवहन महामंडळाच्या (एसटी) बस आणि ईर्टिगा कार यांच्यात भीषण अपघात झाला. या अपघातात कारचे मोठ्या प्रमाणात नुकसान झाले असून वाहनातील काही जण किरकोळ जखमी झाले आहेत. सुदैवाने कोणतीही जीवितहानी झाली नसल्याने मोठा अनर्थ टळला.
मिळालेल्या माहितीनुसार, दापोलीहून खेड येथील विधी महाविद्यालयात परीक्षा देण्यासाठी विद्यार्थ्यांची ईर्टिगा कार (क्र. MH-08-BE-0072) जात होती. नारगोली परिसरात पोहोचताच समोरून येणाऱ्या एसटी बसची (क्र. MH-BT-2441) कारला जोरदार धडक बसली. संबंधित एसटी बस खेडहून दापोलीच्या दिशेने येत होती.
या धडकेत ईर्टिगा कारच्या पुढील भागाचे मोठे नुकसान झाले. कारमधील काही प्रवाशांना किरकोळ दुखापत झाली असून त्यांना प्राथमिक उपचार देण्यात आले. गंभीर दुखापत अथवा जीवितहानी झाली नसल्याने उपस्थितांनी सुटकेचा निश्वास सोडला.
अपघाताची माहिती मिळताच स्थानिक नागरिकांनी तात्काळ घटनास्थळी धाव घेत मदतकार्य सुरू केले. काही काळ या मार्गावरील वाहतूक विस्कळीत झाली होती.
दरम्यान, संबंधित यंत्रणांकडून पुढील कार्यवाही सुरू असून अपघाताचे नेमके कारण काय होते, याचा तपास केला जात आहे.
