लोणी प्रतिनिधी :
लोणी, दि. २० जून : मंचर–लोणी–शिरूर तसेच राजगुरूनगर–पाबळ–लोणी या मार्गांवर शटल बस सेवा सुरू करण्याच्या मागणीची महाराष्ट्र राज्य मार्ग परिवहन महामंडळाने (एसटी) सकारात्मक दखल घेतली असून संबंधित प्रस्ताव पुढील कार्यवाहीसाठी पुणे विभागाकडे पाठविण्यात आला आहे.
भाजपा आंबेगाव तालुका अध्यक्ष किरण बाबाजी वाळुंज यांनी ग्रामीण भागातील नागरिक, विद्यार्थी, शेतकरी, नोकरदार व व्यावसायिकांना नियमित आणि सुलभ सार्वजनिक वाहतूक सुविधा उपलब्ध व्हाव्यात, या उद्देशाने परिवहन मंत्र्यांकडे निवेदन सादर करून या दोन्ही मार्गांवर शटल बस सेवा सुरू करण्याची मागणी केली होती.
परिवहन मंत्र्यांच्या कार्यालयामार्फत हे निवेदन महाराष्ट्र राज्य मार्ग परिवहन महामंडळाच्या वाहतूक विभागाकडे पाठविण्यात आले. संबंधित विषय पुणे विभागाशी निगडित असल्याने प्रस्ताव विभाग नियंत्रक, पुणे विभाग यांच्याकडे आवश्यक कार्यवाहीसाठी वर्ग करण्यात आल्याची माहिती महामंडळाच्या पत्रातून देण्यात आली आहे. तसेच याबाबत योग्य ती कार्यवाही करण्याच्या सूचनाही देण्यात आल्या आहेत.
मंचर–लोणी–शिरूर आणि राजगुरूनगर–पाबळ–लोणी या मार्गांवर शटल बस सेवा सुरू झाल्यास परिसरातील हजारो विद्यार्थी, महिला, शेतकरी, कामगार, नोकरदार आणि सर्वसामान्य प्रवाशांना मोठा दिलासा मिळणार आहे. सार्वजनिक वाहतूक व्यवस्था अधिक सक्षम, नियमित आणि परवडणारी होण्यास यामुळे मदत होणार असल्याने नागरिकांमध्ये समाधानाचे वातावरण निर्माण झाले आहे.
दरम्यान, एसटी प्रशासनाने मागणीची दखल घेतल्याबद्दल किरण बाबाजी वाळुंज यांनी परिवहन मंत्री तसेच महाराष्ट्र राज्य मार्ग परिवहन महामंडळाच्या अधिकाऱ्यांचे आभार व्यक्त केले आहेत. संबंधित मार्गांवर लवकरात लवकर शटल बस सेवा सुरू करण्याचा सकारात्मक निर्णय घेण्यात यावा, अशी अपेक्षाही त्यांनी व्यक्त केली आहे.
