अखिल भारतीय ब्राह्मण महासंघ पुणे जिल्हा पुरोहित आघाडीतर्फे पर्जन्य सूक्त पठण व महाआरतीचे आयोजन
पुणे, दि. 21 :
यावर्षी जून महिना संपत आला तरी राज्यात अपेक्षित पावसाची सुरुवात झालेली नसल्याने शेतकरी वर्ग चिंतेत आहे. राज्यात भरपूर पाऊस पडावा, बळीराजावरील संकट दूर व्हावे आणि सर्वसामान्य जनतेला दिलासा मिळावा यासाठी अखिल भारतीय ब्राह्मण महासंघाच्या पुणे शाखेतर्फे सारसबाग येथील श्री सिद्धिविनायक मंदिरासमोर पर्जन्य सूक्त पठण व महाआरतीचे आयोजन करण्यात आले.
रविवार, दि. 21 जून 2026 रोजी सायंकाळी 6 वाजता पुण्यातील पेशवेकालीन सारसबाग येथील तळ्यातील गणपती मंदिरात सामुदायिक पर्जन्य सूक्त पठण, 108 आवर्तने अथर्वशीर्ष पठण तसेच महाआरती करण्यात आली. या कार्यक्रमाला भाविक भक्तांसह विविध मान्यवरांची उपस्थिती लाभली.
या आध्यात्मिक कार्यक्रमास राज्यसभा खासदार डॉ. सौ. मेघाताई कुलकर्णी यांची प्रमुख उपस्थिती होती. त्यांच्या हस्ते महाआरती करण्यात आली. विशेष म्हणजे पर्जन्य सूक्त मंत्र पठण सुरू असतानाच पुण्यात पावसाच्या सरी बरसल्याने उपस्थित भाविकांमध्ये आनंदाचे वातावरण निर्माण झाले. यामुळे सनातन धर्मातील स्तोत्र आणि मंत्रांवरील श्रद्धा अधिक दृढ झाल्याची भावना उपस्थितांनी व्यक्त केली.
कार्यक्रमाचे आयोजन अखिल भारतीय ब्राह्मण महासंघ पुणे जिल्हाध्यक्ष मंदार रेडे, पुरोहित आघाडी अध्यक्ष संतोष वैद्य आणि उपाध्यक्ष राहुल भाले शास्त्री यांनी केले होते.
यावेळी देवदेवेश्वर संस्थानाचे रमेश भागवत, इतिहासकार जगन्नाथ लडकत, याज्ञवल्क्य ब्राह्मण संस्थेचे पदाधिकारी मनोज तारे व तृप्ती ताई तारे यांच्यासह अनेक मान्यवर उपस्थित होते. या कार्यक्रमास स्थानिक नागरिक व भाविकांचा उत्स्फूर्त प्रतिसाद लाभला.
