प्रतिनिधी : किल्ले विशाळगड येथे सकल हिंदू समाज, शाहूवाडी यांच्या वतीने ज्येष्ठ शुद्ध त्रयोदशी शके १९४८ निमित्त शनिवार, दि. २७ जून २०२६ रोजी भव्य ‘श्री शिवराज्याभिषेक सोहळ्या’चे आयोजन करण्यात आले आहे. धार्मिक, सांस्कृतिक आणि ऐतिहासिक परंपरेचा संगम असलेल्या या सोहळ्यासाठी प्रशासकीय तसेच सामाजिक स्तरावर जय्यत तयारी सुरू आहे.
दिवसभर विविध कार्यक्रमांचे आयोजन करण्यात आले असून सकाळी ८.३० वाजता मंत्री नितेश राणे यांच्या हस्ते मर्दानी खेळांचे उद्घाटन होणार आहे. त्यानंतर सकाळी ९ ते १०.३० या वेळेत गडपायथा ते राजवाडा दरम्यान सवाद्य पालखी मिरवणूक काढण्यात येणार आहे.
सकाळी १०.४५ वाजता छत्रपती शिवाजी महाराज यांच्या मूर्तीला विधीवत अभिषेक व पूजा करण्यात येईल. त्यानंतर सकाळी ११.१५ वाजता प्रमुख पाहुणे व मावळ्यांच्या हस्ते जलाभिषेक, दुग्धाभिषेक आणि नाणेभिषेक सोहळा पार पडणार आहे.
सकाळी ११.४५ वाजता प्रमुख पाहुण्यांचे मनोगत व सत्कार समारंभ होईल. दुपारी १२.३० वाजता आभार प्रदर्शन व सांगता समारंभ पार पडेल. तसेच दुपारी १ वाजता उपस्थित शिवभक्तांसाठी महाप्रसादाचे आयोजन करण्यात आले आहे.
“राजदुंदुभी बिरुदासह ये! राजसभेसह, सैन्यासह ये! सप्तसागरांनो या! चंद्रसूर्यांनो या! ग्रहनक्षत्रांनो या!” अशा शिवकालीन जयघोषात सकल हिंदू समाज, शाहूवाडी यांच्या वतीने सर्व शिवभक्तांना मोठ्या संख्येने उपस्थित राहण्याचे आवाहन करण्यात आले आहे.
