प्रतिनिधी :
नांदवळ येथील एका तरुणाने पत्नीचे इतर व्यक्तीसोबत असलेले प्रेमसंबंध, मानसिक छळ आणि धमक्यांना कंटाळून गळफास घेऊन आत्महत्या केल्याची धक्कादायक घटना समोर आली आहे. या प्रकरणी वाठार पोलीस ठाणे येथे मृत युवकाची पत्नी आणि तिच्या प्रियकराविरुद्ध आत्महत्येस प्रवृत्त केल्याप्रकरणी गुन्हा दाखल करण्यात आला आहे.
पोलिसांनी दिलेल्या माहितीनुसार, धीरज सुभाष पवार (वय ३१, रा. नांदवळ, ता. कोरेगाव) असे आत्महत्या केलेल्या तरुणाचे नाव आहे. दि. १२ एप्रिल २०२६ ते १९ जून २०२६ या कालावधीत ही घटना घडल्याचे सांगण्यात आले.
धीरज यांच्या पत्नीचे गौरव राणे नावाच्या व्यक्तीसोबत प्रेमसंबंध असल्याचे त्यांना समजले होते. या कारणावरून गौरव राणे हा वारंवार धीरज यांना फोन करून शिवीगाळ करत असल्याचा तसेच जीवे मारण्याच्या धमक्या देत असल्याचा आरोप आहे.
तसेच धीरज यांच्या पत्नीने स्वतःच्या कर्जाचा हप्ता आणि तिच्या आईला दरमहा आर्थिक मदत करण्यासाठी धीरज यांच्यावर सतत दबाव टाकत मानसिक त्रास दिल्याचेही फिर्यादीत नमूद करण्यात आले आहे.
या सर्व त्रासाला कंटाळून धीरज यांनी आपल्या राहत्या घरात गळफास घेऊन आत्महत्या केली. घटनास्थळी पोलिसांना एक चिठ्ठीही आढळून आली असल्याची माहिती आहे.
या प्रकरणी सुरज सुभाष पवार यांनी फिर्याद दिल्यानंतर पत्नी व गौरव राणे यांच्यावर आत्महत्येस प्रवृत्त केल्याप्रकरणी गुन्हा दाखल करण्यात आला आहे.
दरम्यान, गुन्हा प्रकटीकरण शाखेच्या पथकाने संशयित आरोपी गौरव राणे याला कुडाळ येथून अटक केली. आरोपींना न्यायालयासमोर हजर केले असता न्यायालयाने त्यांना २६ जूनपर्यंत पोलीस कोठडी सुनावली आहे.
या प्रकरणाचा पुढील तपास उपविभागीय पोलीस अधिकारी राजश्री तेरणी आणि सहाय्यक पोलीस निरीक्षक सुशील भोसले यांच्या मार्गदर्शनाखाली पोलीस उपनिरीक्षक गहिनीनाथ सातव करत आहेत.
