बांबवडे प्रतिनिधी :
महाराष्ट्र शासनाने पोलीस दलात मोठे फेरबदल करत वरिष्ठ आयपीएस अधिकारी विश्वास नांगरे पाटील यांची नागपूर शहर पोलीस आयुक्तपदी नियुक्ती केली आहे. त्यांच्या नियुक्तीमुळे नागपूर पोलीस दलाला कडक शिस्तप्रिय आणि धडाकेबाज नेतृत्व मिळाल्याची चर्चा राज्यभर सुरू आहे.
सांगली जिल्ह्यातील कोकरूड या छोट्याशा गावातून पुढे आलेले विश्वास नांगरे पाटील हे आपल्या धाडसी कार्यपद्धतीसाठी ओळखले जातात. मुंबईवरील २६/११ दहशतवादी हल्ल्यादरम्यान त्यांनी दाखवलेले शौर्य संपूर्ण देशाने पाहिले आहे. पोलीस अधिकारी म्हणूनच नव्हे तर लेखक, प्रेरणादायी वक्ते आणि तरुणांचे मार्गदर्शक म्हणूनही त्यांची विशेष ओळख आहे.
राज्य सरकारच्या ताज्या बदल्यांमध्ये नागपूरचे विद्यमान पोलीस आयुक्त डॉ. रविंद्रकुमार सिंगल यांची बदली करण्यात आली असून त्यांच्या जागी विश्वास नांगरे पाटील यांची नियुक्ती करण्यात आली आहे.
विश्वास नांगरे पाटील यांच्या कडक आणि शिस्तप्रिय कार्यशैलीमुळे नागपूर शहरातील कायदा व सुव्यवस्थेत सकारात्मक बदल होतील, अशी अपेक्षा नागरिकांकडून व्यक्त केली जात आहे. शहरातील वाढती गुन्हेगारी, वाहतूक समस्या आणि कायदा सुव्यवस्थेच्या प्रश्नांवर ते प्रभावीपणे नियंत्रण मिळवतील, असा विश्वास नागपूरकर व्यक्त करत आहेत.
