बांबवडे प्रतिनिधी :
जिद्द, चिकाटी आणि आत्मविश्वासाच्या बळावर कोणतीही अशक्य वाटणारी गोष्ट शक्य करता येते, याचे प्रेरणादायी उदाहरण म्हणजे माउली अडकूर होय. जन्मतःच दोन्ही हात नसतानाही त्यांनी परिस्थितीसमोर हार न मानता मुंबई महानगरपालिकेत (BMC) सहायक कार्यकारी अधिकारी पदापर्यंत यशस्वी झेप घेतली आहे. त्यांच्या या संघर्षमय प्रवासाने आज हजारो तरुणांना नवी प्रेरणा दिली आहे.
माउली अडकूर यांना निसर्गाने हात दिले नसले तरी त्यांनी पायांनाच आपली ताकद बनवले. अत्यंत कठीण परिस्थितीत त्यांनी पायांनी लिहिण्याचा सराव केला आणि त्याच जिद्दीच्या जोरावर शालेय शिक्षण पूर्ण केले. पुढे पदवी आणि एम.ए. पर्यंतचे उच्च शिक्षणही त्यांनी यशस्वीरित्या पूर्ण केले. शारीरिक मर्यादा त्यांच्या शिक्षणाच्या आड आल्या नाहीत. उलट त्यांनी आपल्या मेहनतीने आणि बुद्धिमत्तेने प्रत्येक अडथळ्यावर मात केली.
स्पर्धा परीक्षा आणि कठोर परिश्रमांच्या जोरावर माउली अडकूर यांनी बृहन्मुंबई महानगरपालिका मध्ये सहायक कार्यकारी अधिकारी पद मिळवले. सध्या त्या अत्यंत जबाबदारीच्या पदावर कार्यरत असून आपल्या कामातून अनेकांसाठी प्रेरणास्थान ठरत आहेत.
त्यांच्या या यशामुळे कोल्हापूर जिल्ह्यासह संपूर्ण महाराष्ट्रातून त्यांच्यावर कौतुकाचा वर्षाव होत आहे.
माउली अडकूर यांचा संघर्ष आणि यशाचा प्रवास हा अपंगत्वावर मात करून मोठी स्वप्ने पूर्ण करण्याचा आदर्श ठरला आहे. संकटांवर मात करत आत्मविश्वासाने पुढे जात राहिल्यास यश नक्की मिळते, हा संदेश त्यांच्या जीवनातून समाजाला मिळत आहे.
