कडेगाव वार्ताहर :
सांगली जिल्ह्यातील कडेगाव येथे पाणी संघर्ष समिती आणि शाहू-फुले-आंबेडकर विचारमंच यांच्या वतीने अन्न व औषध प्रशासन विभागाचे आयुक्त तुकाराम मुंढे यांच्या समर्थनार्थ आंदोलन करण्यात आले. तहसीलदार कार्यालयासमोर त्यांच्या प्रतिमेस दुधाने अभिषेक करून आंदोलनकर्त्यांनी त्यांना जाहीर पाठिंबा दर्शविला.
यावेळी मुख्यमंत्री देवेंद्र फडणवीस यांना प्रांताधिकारी, कडेगाव यांच्या मार्फत निवेदन देण्यात आले. तुकाराम मुंढे यांची कार्यकाळ संपेपर्यंत बदली करू नये, अशी मागणी निवेदनातून करण्यात आली आहे.
निवेदनात म्हटले आहे की, तुकाराम मुंढे यांनी अन्न भेसळ, दूध भेसळ, औषध भेसळ तसेच गुटखा माफियांविरोधात कठोर कारवाई करून सर्वसामान्य नागरिकांच्या आरोग्याचे संरक्षण केले आहे. त्यांच्या कार्यामुळे अनेक भेसळखोरांवर कारवाई होऊन त्यांना गजाआड करण्यात आले आहे. त्यामुळे त्यांच्या चांगल्या कामाची दखल घेऊन शासनाने त्यांचा प्रशासकीय उत्कृष्ट अधिकारी म्हणून गौरव करावा, अशीही मागणी करण्यात आली.
तसेच शासनाने या निवेदनाची दखल घेऊन १३ जुलैपर्यंत योग्य तो निर्णय कळवावा, अन्यथा १५ जुलै रोजी कडेगाव शहरातून मोर्चा काढून प्रांताधिकारी कार्यालयासमोर “संविधान बचाव, लोकशाही बचाव” धरणे आंदोलन करण्यात येईल, असा इशाराही आंदोलनकर्त्यांनी दिला.
यावेळी पाणी संघर्ष समितीचे अध्यक्ष डी. एस. देशमुख, फुले-शाहू-आंबेडकर विचारमंचाचे अध्यक्ष महादेव होवाळ, सांगली जिल्हा RPI (A) चे पदाधिकारी, शेतकरी संघटनेचे तालुका अध्यक्ष परशूराम माळी, पाणी संघर्ष समितीचे संयोजक अभिमन्यू वरुडे, भाऊसाहेब यादव, वंचित बहुजन आघाडीचे जिल्हा उपाध्यक्ष जीवन करकटे यांच्यासह संघर्ष समितीचे पदाधिकारी व अनेक नागरिक उपस्थित होते.
