शिरजगाव कसबा | प्रतिनिधी
शिरजगाव कसबा पोलिसांनी जुगार अड्ड्यावर टाकलेल्या धाडीत तीन जणांना ताब्यात घेत १ लाख १६ हजार रुपयांचा मुद्देमाल जप्त केला आहे. या प्रकरणातील सहा आरोपी फरार असून पोलिस त्यांचा शोध घेत आहेत.
मिळालेल्या माहितीनुसार, शिरजगाव कसबा पोलीस स्टेशनचे अधिकारी व कर्मचारी दि. २७ जून रोजी हद्दीत अवैध धंद्यांविरोधात गस्त घालत होते. यावेळी शेतातील मोकळ्या जागेत काही जण जुगार खेळत असल्याची गुप्त माहिती पोलिसांना मिळाली.
यानंतर पोलिसांनी पंचासमक्ष छापा टाकला. पोलिसांची चाहूल लागताच जुगार खेळणाऱ्यांनी पळ काढण्याचा प्रयत्न केला. मात्र, पोलिसांनी तीन जणांना ताब्यात घेतले, तर सहा जण घटनास्थळावरून पसार झाले.
या कारवाईदरम्यान पोलिसांनी पत्त्यांचा कॅट, रोख रक्कम, दोन मोबाईल फोन आणि तीन दुचाकी वाहने असा एकूण १ लाख १६ हजार रुपयांचा मुद्देमाल जप्त केला आहे.
या प्रकरणी शिरजगाव कसबा पोलीस ठाण्यात संबंधितांविरुद्ध गुन्हा दाखल करण्यात आला असून पुढील तपास सुरू आहे.
ही कारवाई ग्रामीण पोलीस अधीक्षक निकेतन कदम, अप्पर पोलीस अधीक्षक दत्ता तोटेवाड आणि उपविभागीय पोलीस अधिकारी मनीष ठाकरे यांच्या मार्गदर्शनाखाली शिरजगावचे ठाणेदार अमन शिरसट, पोलीस उपनिरीक्षक प्रशांत जाधव तसेच पोलीस कर्मचाऱ्यांच्या पथकाने केली.
