शिरजगाव कसबा | प्रतिनिधी
अमरावती जिल्ह्यातील ग्रामीण भागातील शिरजगाव कसबा परिसरात दि. २९ जून रोजी झालेल्या मुसळधार पावसामुळे दुर्दैवी घटना घडली असून पावसाच्या पाण्यात वाहून गेलेल्या दोन जणांपैकी एकाचा मृतदेह आढळून आला आहे, तर दुसऱ्या व्यक्तीचा शोध अद्याप सुरू आहे.
दुपारपासून सुरू झालेल्या मुसळधार पावसाने सायंकाळी पाचनंतर अधिक तीव्र रूप धारण केले. विजांचा कडकडाट आणि सततच्या पावसामुळे खबरदारीचा उपाय म्हणून परिसरातील वीजपुरवठा पूर्णपणे बंद करण्यात आला होता. शिरजगावातील मेगा नदीसह सर्व नदी-नाले दुथडी भरून वाहत होते. त्यामुळे परिसरातील वाहतूकही काही काळासाठी ठप्प झाली होती.
दरम्यान, शिरजगावलगतच्या पांढरी गावातील दोन व्यक्ती पावसाच्या पाण्यात वाहून गेल्याची माहिती समोर आली होती. त्यानंतर प्रशासन आणि स्थानिक नागरिकांकडून शोधमोहीम सुरू करण्यात आली.
या शोधमोहीमेदरम्यान शिरजगाव ते ठूगाव मार्गावरील चालगळ नाल्यात एका व्यक्तीचा मृतदेह आढळून आला. मृत व्यक्तीचे नाव राणू आवारे असे असल्याचे समोर आले आहे. दुसऱ्या व्यक्तीचा शोध अद्याप सुरू असून प्रशासनाकडून शोधकार्य युद्धपातळीवर सुरू आहे.
या घटनेमुळे पांढरी गावासह परिसरात शोककळा पसरली असून नागरिकांमध्ये हळहळ व्यक्त होत आहे.
