घोगाव | प्रतिनिधी
घोगाव येथे आज मंगळवारी पहाटे साडेचारच्या सुमारास खाजगी ट्रॅव्हल्स बसचा भीषण अपघात झाला. प्राथमिक माहितीनुसार बसचा एक्सल तुटल्याने बस रस्त्यालगतच्या छोट्या खड्ड्यात जाऊन पलटी झाली. या दुर्घटनेत बसचे दोन्ही चालक जागीच मृत्युमुखी पडले असून काही प्रवासी किरकोळ जखमी झाले आहेत.
मिळालेल्या माहितीनुसार, संबंधित बस मुंबईहून तासगावकडे येत होती. घोगाव येथील चव्हाण वस्ती जवळ हा अपघात घडला. बसमध्ये सुमारे २५ प्रवासी प्रवास करत होते. अपघातानंतर परिसरात एकच खळबळ उडाली.
घटनेची माहिती मिळताच स्थानिक नागरिकांनी मदतकार्य सुरू केले. जखमी प्रवाशांना तातडीने जवळच्या रुग्णालयात उपचारासाठी दाखल करण्यात आले.
या घटनेची माहिती मिळताच कुंडल पोलीस स्टेशनचे अधिकारी घटनास्थळी दाखल झाले. पोलिसांनी पंचनामा केला असून पुढील तपास सुरू आहे.
प्राथमिक स्तरावर बसचा एक्सल तुटल्यामुळे अपघात झाल्याचे सांगितले जात असले, तरी नेमके कारण तपासानंतर स्पष्ट होणार असल्याची माहिती पोलिसांकडून देण्यात आली आहे.
