प्लास्टिकच्या कुंड्या विसरा; आता HDPE Grow Bags मध्ये फुलवा भाज्या आणि फळांची बाग
प्रतिनिधी : दरिकांत कोळेकर
पूर्वी घराच्या अंगणात तुळस, फुलझाडे आणि भाजीपाल्याची लागवड सहज केली जायची. मात्र शहरांमध्ये जागेअभावी अंगण संस्कृती हळूहळू लोप पावत आहे. अशा परिस्थितीत बाल्कनी, टेरेस किंवा खिडकीजवळील छोट्याशा जागेत बाग फुलवण्यासाठी आता ‘HDPE Grow Bags’ हा पर्याय लोकप्रिय ठरत आहे.
पूर्वी रोपांसाठी मातीच्या, सिमेंटच्या किंवा प्लास्टिकच्या कुंड्यांचा वापर केला जात होता. मात्र कुंडीचे वजन, पाणी निचरा, मुळांना हवा मिळणे आणि फुटण्याची भीती यांसारख्या अडचणी कायम होत्या. या समस्यांवर उपाय म्हणून आता HDPE ग्रो बॅग्जची मोठ्या प्रमाणात क्रेझ वाढत आहे.
काय आहेत HDPE Grow Bags?
HDPE म्हणजे High-Density Polyethylene. हे उच्च दर्जाचे, फूड-ग्रेड आणि BPA-Free प्लास्टिक असते. या बॅग्ज कापडासारख्या विणलेल्या असल्यामुळे त्या साध्या प्लास्टिक पिशव्यांपेक्षा अधिक मजबूत, लवचिक आणि टिकाऊ असतात. विशेष म्हणजे या UV Stabilized असल्याने कडक ऊन आणि मुसळधार पावसातही सहज खराब होत नाहीत.
आरोग्यासाठी सुरक्षित
अनेकांच्या मनात प्रश्न असतो की, प्लास्टिकमध्ये झाडे लावल्याने रसायने मातीत मिसळतील का? तज्ज्ञांच्या मते HDPE हे फूड-ग्रेड प्लास्टिक असल्याने ते मातीत कोणतेही हानिकारक रसायन सोडत नाही. त्यामुळे यात पिकवलेला भाजीपाला, फळे किंवा औषधी वनस्पती सुरक्षित मानल्या जातात.
झाडांच्या वाढीसाठी फायदेशीर
ग्रो बॅग्जमध्ये हवेचा प्रवाह चांगला राहतो. त्यामुळे झाडांच्या मुळांना पुरेशी हवा मिळून त्यांची वाढ निरोगी होते. तसेच मुळे वाढल्यानंतर कुंडी फुटण्याचा किंवा क्रॅक जाण्याचा प्रश्नही राहत नाही.
हलक्या, टिकाऊ आणि वापरण्यास सोप्या
मातीच्या किंवा सिमेंटच्या कुंड्यांप्रमाणे या बॅग्ज जड नसतात. एका ठिकाणाहून दुसऱ्या ठिकाणी सहज हलवता येतात. वापर नसेल तर त्यातील माती काढून बॅग धुवून घडी करून ठेवता येते. चांगल्या दर्जाच्या HDPE ग्रो बॅग्ज ५ ते ७ वर्षे सहज टिकतात.
विविध आकारांमध्ये उपलब्ध
टोमॅटो, मिरची, कोथिंबीर, फुलझाडे तसेच फळझाडांसाठी वेगवेगळ्या आकारांच्या ग्रो बॅग्ज बाजारात उपलब्ध आहेत. त्यांच्या आकार, जाडी आणि गुणवत्तेनुसार किंमत ठरते.
शहरांसाठी सोयीस्कर पर्याय
मातीच्या कुंड्या पारंपरिक आणि आकर्षक वाटतात; मात्र कमी जागेत बागकामासाठी HDPE Grow Bags अधिक सोयीस्कर ठरत आहेत. विशेषतः टेरेस गार्डनिंग आणि बाल्कनी गार्डनिंग करणाऱ्यांमध्ये या बॅग्जची लोकप्रियता झपाट्याने वाढत आहे.
थोडी काळजी, योग्य माती आणि दर्जेदार ग्रो बॅग्ज यांच्या मदतीने आता कमी जागेतही सुंदर आणि हिरवीगार बाग फुलवणे सहज शक्य झाले आहे.
