एरंडोल : के. डी. पाटील इंग्लिश मीडियम स्कूल येथे नवीन अभ्यासक्रमाच्या प्रभावी अंमलबजावणीसाठी शिक्षकांचे तालुकास्तरीय प्रशिक्षण उत्साहात पार पडले. प्रशिक्षणादरम्यान अध्यापनातील आधुनिक पद्धती, विद्यार्थीकेंद्रित शिक्षण आणि गुणवत्तापूर्ण शिक्षण याविषयी सुलभकांनी शिक्षकांना अनमोल मार्गदर्शन केले.
या प्रशिक्षणामध्ये आधुनिक शिक्षण पद्धतींसोबत भारतीय संस्कृती आणि परंपरेचे जतन करण्याचाही सुंदर संदेश देण्यात आला. प्रशिक्षणाच्या मधल्या सुट्टीत महिला शिक्षिकांनी वटपौर्णिमा सण उत्साहात साजरा केला. त्यांनी वडाच्या झाडाची विधिवत पूजा करून कुटुंबाच्या सुख-समृद्धी व पतीच्या दीर्घायुष्यासाठी प्रार्थना केली.
यावेळी “शिक्षणातून अध्यात्माकडे” हा प्रेरणादायी संदेश अधोरेखित झाला. आधुनिक शिक्षणासोबत भारतीय संस्कृतीची जपणूक करण्याचा आदर्श उपक्रम या माध्यमातून समाजासमोर ठेवण्यात आला.
विशेष म्हणजे, महिला शिक्षिकांनी प्रशिक्षणाला गैरहजर न राहता शंभर टक्के उपस्थितीत हा नाविन्यपूर्ण उपक्रम राबविल्याने सर्व स्तरांतून त्यांचे कौतुक करण्यात आले.
या उपक्रमाबद्दल गटशिक्षणाधिकारी श्री. आर. डी. महाजन साहेब तसेच पंचायत समिती एरंडोलचे शापोआ अधीक्षक श्री. जे. डी. पाटील साहेब यांनी महिला शिक्षिका व आयोजकांचे विशेष अभिनंदन केले.
