वर्धा
पोलीस अधीक्षक सौरभ कुमार अग्रवाल यांच्या संकल्पनेतून तसेच अप्पर पोलीस अधीक्षक सदाशिव वाघमारे यांच्या मार्गदर्शनाखाली रामनगर पोलीस स्टेशनच्या वतीने स्वाध्याय मंदिर, रामनगर येथे भव्य रक्तदान शिबिराचे आयोजन करण्यात आले.
या कार्यक्रमाला उपविभागीय पोलीस अधिकारी सुनील महाडिक यांनी सदिच्छा भेट देत रक्तदात्यांचे कौतुक केले. यावेळी त्यांनी रक्तदानाचे सामाजिक महत्त्व अधोरेखित करत “रक्तदान हे जीवनदान असून प्रत्येक नागरिकाने सामाजिक उत्तरदायित्व म्हणून नियमित रक्तदान करावे,” असे आवाहन केले.
या रक्तदान शिबिराचे आयोजन पोलीस निरीक्षक पौर्णिमा राखोंडे यांच्या मार्गदर्शनाखाली करण्यात आले. शिबिरास पोलीस अधिकारी, पोलीस अंमलदार, विविध सामाजिक संघटनांचे पदाधिकारी व सदस्य तसेच परिसरातील नागरिकांनी उत्स्फूर्त प्रतिसाद दिला.
लॉयर्स ब्लड बँक, वर्धा यांच्या सहकार्याने आयोजित करण्यात आलेल्या या शिबिरात एकूण ७१ रक्तदात्यांनी स्वेच्छेने रक्तदान करून सामाजिक बांधिलकीचे दर्शन घडविले. रक्तसंकलनाचे कार्य लॉयर्स ब्लड बँकेच्या वैद्यकीय अधिकारी व कर्मचाऱ्यांनी नियोजनबद्ध पद्धतीने पार पाडले.
हा उपक्रम यशस्वी करण्यासाठी रामनगर पोलीस स्टेशनचे अधिकारी व कर्मचारी, लॉयर्स ब्लड बँकेचे अधिकारी व कर्मचारी, सामाजिक संस्था, स्वयंसेवक तसेच सर्व रक्तदात्यांनी मोलाचे सहकार्य केले. कार्यक्रमाच्या यशस्वी आयोजनाबद्दल सर्व सहभागी, सहकार्य करणाऱ्या संस्था व रक्तदात्यांचे रामनगर पोलीस स्टेशनच्या वतीने आभार मानण्यात आले.
सामाजिक बांधिलकी जपत राबविण्यात आलेल्या या उपक्रमाचे नागरिकांकडून स्वागत करण्यात येत असून, भविष्यातही अशा लोकहिताच्या उपक्रमांचे आयोजन करण्यात येणार असल्याचे यावेळी सांगण्यात आले.
या वेळी पोलीस कर्मचारी, होमगार्ड तसेच परिसरातील ग्रामस्थ मोठ्या संख्येने उपस्थित होते.
