लोणी प्रतिनिधी
आंबेगाव तालुक्यातील धामणी येथील शिवाजी विद्यालय आणि जिल्हा परिषद प्राथमिक शाळेत विद्यार्थ्यांना शैक्षणिक साहित्य वाटपाचा उपक्रम उत्साहात पार पडला. उद्योजक मंगेश नवले, गोपाळ रोडे आणि भाऊसाहेब करंडे यांच्या वतीने हा सामाजिक उपक्रम राबविण्यात आला.
यावेळी विद्यार्थ्यांना वह्या, पेन तसेच अन्य आवश्यक शैक्षणिक साहित्याचे वितरण करण्यात आले. ग्रामीण भागातील विद्यार्थ्यांना शिक्षणासाठी प्रोत्साहन मिळावे आणि त्यांच्या शैक्षणिक गरजा पूर्ण व्हाव्यात, या उद्देशाने हा उपक्रम आयोजित करण्यात आला होता.
तसेच माजी मंत्री तथा आमदार दिलीप वळसे पाटील, जिल्हा परिषद उपाध्यक्ष विवेक वळसे पाटील आणि मंत्रालयातील कक्ष अधिकारी वैभव भूमकर यांच्या विशेष पाठपुराव्यामुळे शिवाजी विद्यालयासाठी सुमारे तीन लाख रुपये किमतीचे क्रीडा साहित्य उपलब्ध करून देण्यात आले. त्यामुळे विद्यार्थ्यांच्या क्रीडा कौशल्यांना चालना मिळणार असून शाळेच्या क्रीडा विकासाला बळ मिळणार आहे.
कार्यक्रमास धामणीच्या लोकनियुक्त सरपंच प्रतीक्षाताई जाधव पाटील, प्राचार्य सोमवंशी सर, मुख्याध्यापक थोरात सर, गौरीताई नवले, सतीश मामा जाधव, रंगनाथ जाधव, गणपत भूमकर, बाळासाहेब विधाटे, सिताराम जाधव, देविदास करंजखेल, सुहास रोडे, अक्षय रोडे, बाळासाहेब बढेकर, भाऊसाहेब कदम, किरण जाधव, समीर बढेकर, भूषण रोडे, चंद्रकांत रोडे, सार्थक जाधव, पांडुरंग जाधव पाटील, वैभव सांडभोर, संकेत बढेकर यांच्यासह शिक्षक, ग्रामस्थ आणि मोठ्या संख्येने विद्यार्थी उपस्थित होते.
उपस्थित मान्यवरांनी विद्यार्थ्यांना शिक्षणासोबतच क्रीडा क्षेत्रातही प्रगती करण्याचे आवाहन केले. या उपक्रमामुळे विद्यार्थ्यांमध्ये आनंदाचे वातावरण निर्माण झाले असून आयोजकांच्या सामाजिक बांधिलकीचे सर्व स्तरातून कौतुक होत आहे.
