प्रतिनिधी
आदिम आदिवासी सामाजिक संस्थेमार्फत पनवेल, कर्जत आणि मावळ तालुक्यातील दुर्गम आदिवासी पाड्यांवर विद्यार्थ्यांसाठी मोफत अभ्यासिका वर्ग सुरू करण्यात आले असून या उपक्रमाला पालक आणि ग्रामस्थांकडून उत्स्फूर्त प्रतिसाद मिळत आहे.
आर्थिकदृष्ट्या दुर्बल व शैक्षणिक सुविधांपासून वंचित असलेल्या आदिवासी विद्यार्थ्यांना दर्जेदार शिक्षणाची संधी मिळावी, त्यांचा शैक्षणिक पाया भक्कम व्हावा आणि स्पर्धात्मक परीक्षांची तयारी करता यावी, या उद्देशाने संस्था हा उपक्रम राबवत आहे. स्वयंसेवकांच्या माध्यमातून विद्यार्थ्यांना नियमित मार्गदर्शन, अभ्यासाचे नियोजन आणि शैक्षणिक साहित्य उपलब्ध करून दिले जात आहे.
याशिवाय संस्था आदिवासी समाजाच्या विविध समस्या सोडविण्यासाठीही सातत्याने कार्यरत आहे. शासकीय योजनांचा लाभ मिळवून देणे, आवश्यक कागदपत्रांसाठी मार्गदर्शन, शैक्षणिक व सामाजिक जनजागृती तसेच समाजहिताच्या विविध उपक्रमांद्वारे आदिवासी बांधवांना मुख्य प्रवाहात आणण्यासाठी प्रयत्न केले जात आहेत.
संस्थेच्या या समाजोपयोगी कार्याचे स्थानिक नागरिकांनी स्वागत केले असून अधिकाधिक आदिवासी विद्यार्थ्यांनी शिक्षणाचा लाभ घ्यावा आणि समाजाच्या सर्वांगीण विकासासाठी अशा उपक्रमांना सहकार्य करावे, असे आवाहन संस्थेच्या पदाधिकाऱ्यांनी केले आहे.
