उरण | प्रतिनिधी
उरण तालुक्यातील दिवेखोडे येथील आदिवासी कुटुंबाच्या जमिनीचा ताबा कायदेशीर वारसांना देण्याचे आदेश महसूल प्रशासनाने दिले आहेत. मंडळ अधिकारी, जासई यांनी यासंदर्भात संबंधितांना नोटीस बजावली असून, सात दिवसांच्या आत स्वखुशीने जमिनीचा ताबा देण्याचे निर्देश दिले आहेत.
मिळालेल्या माहितीनुसार, आदिम आदिवासी सामाजिक संस्था, पोयेज यांच्या पुढाकाराने व संस्थापक अध्यक्षांच्या माध्यमातून दिवेखोडे येथील गोपाळ लहाण्या कातकरी यांच्या कायदेशीर वारसांना सर्वे क्रमांक १४/८ व १००/१ या जमिनीचा ताबा मिळावा, यासाठी तहसील कार्यालयाकडे पाठपुरावा करण्यात आला होता.
तहसीलदार, उरण यांनी दिलेल्या आदेशानुसार मंडळ अधिकारी, जासई आणि ग्राम महसूल अधिकाऱ्यांना संबंधित जमिनीचा ताबा कायदेशीर वारसांकडे देण्याची कार्यवाही करण्याचे निर्देश देण्यात आले आहेत.
नोटीसमध्ये संबंधित जमीनधारकास पत्र प्राप्त झाल्यानंतर सात दिवसांच्या आत स्वखुशीने जमिनीचा ताबा द्यावा, असे स्पष्ट करण्यात आले आहे. अन्यथा १७ जुलै २०२६ रोजी सकाळी ११ वाजता पोलिस बंदोबस्तात संबंधित जमिनीचा ताबा कायदेशीर वारसांना देण्यात येईल, असा इशाराही महसूल प्रशासनाने दिला आहे.
या कारवाईमुळे अनेक वर्षांपासून प्रलंबित असलेल्या आदिवासींच्या जमीनहक्काच्या प्रश्नाला न्याय मिळण्याची अपेक्षा व्यक्त केली जात असून, आदिवासी समाजामध्ये समाधानाचे वातावरण आहे. तसेच अशा प्रकरणांमध्ये प्रशासनाने तत्परतेने कारवाई करून आदिवासींच्या हक्कांचे संरक्षण करावे, अशी मागणीही स्थानिकांकडून होत आहे.
