श्रीरामपूर (प्रतिनिधी)
विधानसभा मतदारसंघातील मतदार याद्यांच्या विशेष सखोल पुनरीक्षण कार्यक्रमास सुरुवात झाली असून, ३० जूनपासून प्रत्यक्ष घरोघरी जाऊन सर्वेक्षण मोहिमेला प्रारंभ करण्यात आला आहे. मतदार नोंदणी अधिकारी तथा प्रांताधिकारी किरण सावंत पाटील यांनी पत्रकार परिषदेत ही माहिती दिली.
यावेळी तहसीलदार मिलिंदकुमार वाघ, गटशिक्षणाधिकारी स्मिता निकाळजे, मुख्याधिकारी मनोज उकिरडे तसेच ऋषिकेश पाटील उपस्थित होते. या मोहिमेसाठी मतदारसंघातील ३११ मतदान केंद्रांवर ३११ बीएलओ आणि ३१ क्षेत्रीय पर्यवेक्षकांची नियुक्ती करण्यात आली आहे.
श्रीरामपूर मतदारसंघात एकूण ३ लाख १ हजार ४९७ मतदार असून, त्यामध्ये १ लाख ५३ हजार २४२ पुरुष, १ लाख ५२ हजार १९४ महिला आणि ६१ तृतीयपंथी मतदारांचा समावेश आहे. मतदारसंघाचे सुमारे ८७ टक्के मॅपिंग पूर्ण झाले असून, उर्वरित भागातील दुबार, मयत तसेच कायमस्वरूपी स्थलांतरित नागरिकांची नावे मतदार याद्यांतून वगळण्यात येणार आहेत.
या राष्ट्रीय कर्तव्यात कसूर करणाऱ्या कर्मचाऱ्यांवर तसेच शासकीय कामात अडथळा आणणाऱ्यांवर कठोर कारवाई करण्यात येईल, असा इशारा प्रांताधिकारी किरण सावंत पाटील यांनी दिला.
तसेच सोशल मीडियावर मतदार यादी किंवा या मोहिमेबाबत कोणतीही चुकीची अथवा दिशाभूल करणारी माहिती पसरवल्यास संबंधितांवर सायबर कायद्याअंतर्गत कठोर कारवाई करण्यात येईल, असे प्रशासनाने स्पष्ट केले आहे. नागरिकांनी कोणतीही शंका असल्यास थेट तहसील कार्यालयाच्या निवडणूक शाखेशी संपर्क साधावा, असे आवाहनही करण्यात आले आहे.
