कोलाड : तटकरे चॅरिटेबल ट्रस्ट संचलित डॉ. श्री. नानासाहेब धर्माधिकारी कला, वाणिज्य व विज्ञान महाविद्यालय, गोवे-कोलाड येथे जागतिक योग दिन उत्साहात साजरा करण्यात आला. संस्थेचे सचिव मा. श्री. संदीपजी तटकरे यांच्या मार्गदर्शनाखाली दिनांक २२ जून २०२६ रोजी राष्ट्रीय सेवा योजना, आजीवन अध्ययन व विस्तार विभाग, सांस्कृतिक विभाग, महिला कक्ष विभाग तसेच जिमखाना विभाग यांच्या संयुक्त विद्यमाने या कार्यक्रमाचे आयोजन करण्यात आले होते.
या कार्यक्रमास प्रमुख मार्गदर्शक म्हणून योग शिक्षक डॉ. अमलपुरे सूर्यकांत विश्वनाथ उपस्थित होते. तसेच प्राचार्य डॉ. विश्वास देशमुख, उपप्राचार्या नेहल प्रधान, कार्यालयीन अधीक्षक श्री. अमोल गोलिपकर, कला विभाग प्रमुख डॉ. सतीश सावळे, विज्ञान विभाग प्रमुख प्रा. रेश्मा शेळके, महिला कक्ष विभाग प्रमुख प्रा. जयवंती अडलीकर, राष्ट्रीय सेवा योजना प्रमुख प्रा. अनिरुद्ध मोरे, जिमखाना विभाग प्रमुख प्रा. दर्शना माळी यांच्यासह सर्व प्राध्यापक व प्राध्यापकेत्तर कर्मचारी उपस्थित होते.
कार्यक्रमाच्या प्रारंभी प्रमुख मार्गदर्शक डॉ. अमलपुरे सूर्यकांत यांचे पुष्पगुच्छ देऊन स्वागत करण्यात आले. कार्यक्रमाची प्रस्तावना प्राचार्य डॉ. विश्वास देशमुख यांनी केली.
यावेळी विद्यार्थ्यांना योगाचे महत्त्व पटवून देत विविध योगासने, प्राणायाम आणि सूर्यनमस्कार यांचे प्रात्यक्षिकाद्वारे मार्गदर्शन करण्यात आले. कपालभाती, भ्रमरी, अनुलोम-विलोम, ओम उच्चार, बटरफ्लाय, वज्रासन, बालासन, शशांकासन, ताडासन, वृक्षासन, त्रिकोणासन तसेच सूर्यनमस्कार यांचा सराव घेण्यात आला.
“योगा करणे ही काळाची गरज असून प्रत्येकाने नियमित योगाभ्यास करावा,” असा संदेश प्राचार्य डॉ. विश्वास देशमुख यांनी यावेळी दिला.
कार्यक्रमाचे आभार प्रदर्शन डॉ. सतीश सावळे यांनी केले. कार्यक्रम यशस्वी करण्यासाठी महाविद्यालयातील सर्व प्राध्यापक, प्राध्यापकेत्तर कर्मचारी तसेच मोठ्या संख्येने उपस्थित विद्यार्थ्यांनी सहकार्य केले.
