घुलेवाडी :
सीमा सुरक्षा दलात (BSF) सहाय्यक उपनिरीक्षक (ASI) पदावर कार्यरत असलेले घुलेवाडी गावचे सुपुत्र श्री. जगदिश नामदेव तुपसुंदर हे प्रदीर्घ देशसेवेनंतर नुकतेच सेवानिवृत्त झाले. त्यांच्या सन्मानार्थ घुलेवाडी येथे सेवापूर्ती गौरव सोहळ्याचे आयोजन करण्यात आले होते. या कार्यक्रमात मान्यवर, ग्रामस्थ आणि तुपसुंदर परिवारातील सदस्य मोठ्या संख्येने उपस्थित होते.
यावेळी उपस्थित मान्यवरांनी श्री. जगदिश तुपसुंदर यांचा शाल, श्रीफळ व पुष्पगुच्छ देऊन सत्कार केला तसेच त्यांच्या पुढील आयुष्यासाठी शुभेच्छा दिल्या. देशसेवेतील त्यांच्या कार्याचा गौरव करताना उपस्थितांनी त्यांच्या जिद्द, कर्तव्यनिष्ठा आणि प्रामाणिक सेवाभावाचे कौतुक केले.
कार्यक्रमादरम्यान तुपसुंदर कुटुंबीयांशी संवाद साधताना अनेक जुन्या आठवणींना उजाळा मिळाला. जगदिश तुपसुंदर यांचे वडील स्व. नामदेव तुपसुंदर यांच्या आठवणींनाही यावेळी विशेष उजाळा देण्यात आला. ‘श्री कानिफनाथ डफकरी मंडळा’च्या विविध कार्यक्रमांच्या माध्यमातून त्यांच्याशी जुळलेले स्नेहबंध उपस्थितांनी आठवले.
अत्यंत सामान्य परिस्थितीतून पुढे येत श्री. जगदिश तुपसुंदर यांनी कठोर परिश्रम आणि जिद्दीच्या जोरावर सीमा सुरक्षा दलात प्रवेश मिळवला. देशाच्या सीमांचे रक्षण करताना त्यांनी अनेक वर्षे निष्ठेने सेवा बजावली. त्यांचा हा प्रेरणादायी प्रवास ग्रामीण भागातील युवकांसाठी आदर्शवत असल्याची भावना यावेळी व्यक्त करण्यात आली.
“शून्य परिस्थितीतून स्वतःचे स्वतंत्र स्थान निर्माण करून देशसेवेचा मानाचा टप्पा गाठणारे जगदिश तुपसुंदर हे युवकांसाठी प्रेरणास्थान आहेत. त्यांच्या कार्याचा संपूर्ण गावाला अभिमान आहे,” असे मत उपस्थित मान्यवरांनी व्यक्त केले.
या गौरव सोहळ्यानिमित्त घुलेवाडी परिसरात आनंदाचे वातावरण निर्माण झाले असून विविध स्तरांतून त्यांच्यावर शुभेच्छांचा वर्षाव होत आहे.
