कोपरगाव प्रतिनिधी :
‘स्वावलंबी शिक्षण हेच आमचे ब्रीद’ हा कर्मवीर भाऊराव पाटील यांचा विचार जोपासत शैक्षणिक क्षेत्रात उल्लेखनीय कार्य करणाऱ्या रयत शिक्षण संस्थेच्या कोपरगाव येथील डॉ. सी. एम. मेहता कन्या विद्या मंदिर या शाखेच्या स्कूल कमिटी सदस्यपदी सौ. रेणुकाताई विवेकभैय्या कोल्हे यांची नुकतीच निवड करण्यात आली आहे.
रयत शिक्षण संस्था ही महाराष्ट्रातील अग्रगण्य आणि प्रतिष्ठित शिक्षण संस्था म्हणून ओळखली जाते. या संस्थेच्या शालेय समितीवर निवड होणे ही सन्मानाची बाब मानली जाते. सौ. रेणुकाताई कोल्हे यांच्या निवडीमुळे शाळेच्या सर्वांगीण विकासाला तसेच प्रशासकीय कामकाजाला अधिक बळ मिळणार असल्याची भावना व्यक्त होत आहे.
शैक्षणिक आणि सामाजिक क्षेत्रात सक्रिय असलेल्या सौ. रेणुकाताई कोल्हे यांच्या अनुभवाचा लाभ शाळेच्या प्रगतीसाठी होणार असून विद्यार्थिनींच्या शैक्षणिक गुणवत्तावाढीसाठी तसेच विविध उपक्रमांच्या प्रभावी अंमलबजावणीसाठी त्यांचे योगदान महत्त्वपूर्ण ठरणार आहे.
त्यांच्या या निवडीबद्दल विविध क्षेत्रांतील मान्यवर, हितचिंतक, सामाजिक कार्यकर्ते तसेच नागरिकांकडून त्यांच्यावर शुभेच्छांचा वर्षाव होत आहे. त्यांच्या पुढील शैक्षणिक व सामाजिक कार्यासाठी सर्व स्तरांतून शुभेच्छा व्यक्त करण्यात येत आहेत.
