नाशिक | प्रतिनिधी :
नाशिक शहर व परिसरात अतिवृष्टीचा गंभीर इशारा देण्यात आल्याने जिल्हा प्रशासनाने हाय अलर्ट जारी केला आहे. संभाव्य ढगफुटीसदृश पावसाच्या पार्श्वभूमीवर नागरिकांनी अत्यावश्यक कामाशिवाय घराबाहेर पडू नये, असे आवाहन महानगरपालिका आयुक्त आणि जिल्हाधिकारी यांनी केले आहे. काही भागांत अतिवृष्टी होण्याची शक्यता लक्षात घेऊन प्रशासनाने व्यापक खबरदारीच्या उपाययोजना सुरू केल्या आहेत.
हवामान विभागाच्या अंदाजानुसार नाशिक परिसरात अल्पावधीत अतिमुसळधार पाऊस पडण्याची शक्यता असून जिल्हा प्रशासन सतर्क झाले आहे. नदी-नाले, ओढे, धरण परिसर तसेच डोंगराळ भागांपासून दूर राहण्याचे आणि अनावश्यक प्रवास टाळण्याचे आवाहन नागरिकांना करण्यात आले आहे.
अतिवृष्टीच्या इशाऱ्याच्या पार्श्वभूमीवर जिल्ह्यातील शाळा व महाविद्यालयांना सुट्टी जाहीर करण्यात आली असून काही ठिकाणी साप्ताहिक बाजारही बंद ठेवण्याचे आदेश देण्यात आले आहेत. आपत्ती व्यवस्थापन यंत्रणा, महसूल, पोलीस आणि अन्य विभागांना सज्ज राहण्याच्या सूचना देण्यात आल्या आहेत.
प्रशासनाने नागरिकांना अफवांवर विश्वास न ठेवता केवळ अधिकृत सूचनांचे पालन करण्याचे आवाहन केले असून, स्वतःची व कुटुंबीयांची सुरक्षितता जपण्याचे आवाहन केले आहे.
