सोयगाव | प्रतिनिधी
सोयगाव तालुक्यातील ८४ गावांतील सरकारी शाळांमध्ये शिकणाऱ्या विद्यार्थ्यांना मोफत शैक्षणिक साहित्याचे वाटप करण्याचा स्तुत्य सामाजिक उपक्रम हाती घेण्यात आला आहे. समर्पण फाऊंडेशन, सोयगाव आणि प.पू. धोंडीराम बाबा चॅरिटेबल ट्रस्ट, गोद्री यांच्या संयुक्त विद्यमाने हा उपक्रम राबविण्यात येणार आहे.
आर्थिक परिस्थितीमुळे कोणताही विद्यार्थी शालेय साहित्याअभावी शिक्षणापासून वंचित राहू नये, या उद्देशाने प्रत्येक विद्यार्थ्याला मोफत शालेय साहित्य उपलब्ध करून दिले जाणार आहे.
या उपक्रमांतर्गत प्रत्येक विद्यार्थ्याला एक स्कूल बॅग, सहा वहींचा संच आणि एक कंपास बॉक्स मोफत देण्यात येणार आहे. हा उपक्रम केवळ साहित्य वाटपापुरता मर्यादित नसून विद्यार्थ्यांच्या शिक्षणाला प्रोत्साहन देत त्यांच्या उज्ज्वल भविष्यासाठी हातभार लावण्याचा प्रयत्न असल्याचे आयोजकांनी सांगितले.
या सामाजिक आणि शैक्षणिक उपक्रमात नागरिक, सामाजिक संस्था, उद्योजक तसेच विविध क्षेत्रातील दानशूर व्यक्तींनी सहभागी होऊन विद्यार्थ्यांच्या शिक्षणासाठी योगदान द्यावे, असे आवाहन आयोजकांनी केले आहे.
विद्यार्थ्यांच्या हातात शालेय साहित्य देणे म्हणजे त्यांच्या शिक्षणाच्या प्रवासाला बळ देण्यासह त्यांच्या स्वप्नांना नवे पंख देण्यासारखे असल्याची भावना यावेळी व्यक्त करण्यात आली.
