भूम | प्रतिनिधी
राज्यभर सुरू असलेल्या भेसळविरोधी विशेष मोहिमेअंतर्गत अन्न व औषध प्रशासनाने (एफडीए) भूम शहरात धडक कारवाई करत विनापरवाना साठवून ठेवलेली तब्बल १,१२५ किलो दूध पावडर जप्त केली. रविवारी (दि. ५ जुलै) झालेल्या या कारवाईत ६१ बॅगमधील सुमारे २ लाख ११ हजार रुपयांचा मुद्देमाल ताब्यात घेण्यात आला असून संबंधिताविरुद्ध गुन्हा दाखल करण्याची प्रक्रिया सुरू आहे.
मिळालेल्या माहितीनुसार, भूम शहरातील बाळासाहेब घोडके यांच्या ताब्यात ही दूध पावडर आवश्यक परवानगीशिवाय साठवून ठेवण्यात आली होती. अन्न व औषध प्रशासनाच्या पथकाने छापा टाकून संपूर्ण साठा जप्त केला. या कारवाईनंतर भूम शहरासह तालुक्यात मोठी खळबळ उडाली आहे.
भूम तालुका दुग्ध व्यवसायासाठी प्रसिद्ध असून येथील खवा, पेढे व इतर दुग्धजन्य पदार्थांना राज्यासह देशातील विविध भागांत मोठी मागणी आहे. अनेक धार्मिक स्थळांवरही येथील दुग्धजन्य पदार्थांची विक्री केली जाते. मात्र, काही ठिकाणी दुधाची गुणवत्ता कृत्रिमरीत्या वाढविण्यासाठी किंवा उत्पादनाचे प्रमाण वाढविण्यासाठी दूध पावडरचा वापर होत असल्याच्या तक्रारी सातत्याने समोर येत होत्या.
तज्ज्ञांच्या मते, भेसळयुक्त दुग्धजन्य पदार्थांचा आरोग्यावर विशेषतः लहान मुलांवर विपरीत परिणाम होऊ शकतो. त्यामुळे अशा प्रकारच्या कारवायांना महत्त्व प्राप्त झाले आहे.
अन्न व औषध प्रशासनाचे आयुक्त तुकाराम मुंढे यांच्या मार्गदर्शनाखाली राज्यभर भेसळविरोधी विशेष मोहीम राबविण्यात येत असून, त्याच मोहिमेअंतर्गत भूम येथील ही कारवाई करण्यात आली.
या धडक कारवाईमुळे भेसळ करणाऱ्यांचे धाबे दणाणले असून, ग्राहकांच्या आरोग्याच्या संरक्षणासाठी अशा कारवाया सातत्याने सुरू ठेवाव्यात, अशी मागणी नागरिकांकडून होत आहे.
