मुंबई | प्रतिनिधी :
महाराष्ट्रातील विनाअनुदानित व अंशतः अनुदानित शिक्षक व शिक्षकेतर कर्मचाऱ्यांच्या विविध मागण्यांसाठी शिक्षक समन्वय संघाच्या वतीने २२ जूनपासून मुंबईतील आझाद मैदान येथे सुरू असलेल्या आंदोलनाला अमरावती विभागाचे शिक्षक आमदार किरणराव सरनाईक यांनी भेट देऊन आंदोलनकर्त्यांशी संवाद साधला.
यावेळी बोलताना आमदार सरनाईक यांनी, अनुदान टप्पा वाढीचा निर्णय याच विधिमंडळ अधिवेशनात निकाली निघावा यासाठी आपण पूर्णपणे प्रयत्नशील असल्याचे सांगितले. सभागृहात लक्षवेधी, पुरवणी मागण्या आणि विशेष उल्लेखाच्या माध्यमातून हा मुद्दा प्रभावीपणे मांडल्याचेही त्यांनी स्पष्ट केले.
यासंदर्भात उपमुख्यमंत्री एकनाथ शिंदे यांनी मुख्यमंत्री देवेंद्र फडणवीस यांच्यासोबत बैठक घेऊन हा प्रश्न लवकरात लवकर मार्गी लावण्याचे आश्वासन दिल्याचे सरनाईक यांनी सांगितले. त्यामुळे वाढीव अनुदान टप्प्याबाबत सकारात्मक निर्णय होण्याची अपेक्षा शिक्षकांमध्ये व्यक्त होत आहे.
आंदोलनस्थळी आमदार रोहित पवार, ज्ञानेश्वर म्हात्रे, जयंत आसगावकर यांच्यासह विविध मान्यवरांनी भेट देऊन शिक्षकांच्या मागण्यांना पाठिंबा दर्शविला.
या आंदोलनात राज्यभरातील हजारो विनाअनुदानित व अंशतः अनुदानित शिक्षक आणि शिक्षकेतर कर्मचारी सहभागी झाले असून, शासनाने लवकरात लवकर सकारात्मक निर्णय घ्यावा, अशी मागणी आंदोलनकर्त्यांनी केली.
