नाशिक | प्रतिनिधी :
नाशिकमधील जेल रोडवरील पुलावर मंगळवारी पहाटे एका धोकादायक खड्ड्यात अवजड मालवाहतूक ट्रक अडकल्याने जेल रोड ते नांदूर नाका दरम्यानची वाहतूक तब्बल पाच तास ठप्प झाली. या घटनेमुळे वाहनचालकांना मोठा मनस्ताप सहन करावा लागला.
निलकंठेश्वर मंदिरासमोरील कुंभमेळा कामासाठी खोदलेल्या खड्ड्यात हा ट्रक अडकला होता. पोलिसांनी तीन जेसीबी आणि एका हायवा वाहनाच्या सहाय्याने ट्रक बाहेर काढल्यानंतर वाहतूक हळूहळू पूर्ववत करण्यात आली.
दरम्यान, जेल रोड, नांदूर नाका आणि नाशिक रोड परिसरातील रस्त्यांची दुरवस्था तसेच कुंभमेळ्याच्या कामासाठी खोदलेले खड्डे अद्यापही कायम असल्याने नागरिकांनी प्रशासनाविरोधात तीव्र नाराजी व्यक्त केली आहे. कामे रखडल्यामुळे वारंवार वाहतूक कोंडी व अपघात घडत असल्याचा आरोप नागरिकांनी केला.
स्थानिकांच्या म्हणण्यानुसार, गेल्या चार दिवसांत याच धोकादायक खड्ड्यात अनेक वाहने अडकली असून रविवारी एक पिकअप वाहनही त्यात अडकले होते. पुलावरील खड्ड्यांमुळे वाहनचालकांच्या सुरक्षिततेचा प्रश्न निर्माण झाला असून तातडीने रस्त्यांची दुरुस्ती करण्याची मागणी करण्यात येत आहे.
नाशिक शहरातील कुंभमेळा विकासकामांच्या ठिकाणी मोठ्या प्रमाणात खोदकाम सुरू असले तरी त्यानंतर सुरक्षिततेच्या उपाययोजना आणि रस्त्यांची दुरुस्ती वेळेत होत नसल्याने नागरिकांनी प्रशासन आणि संबंधित यंत्रणांनी त्वरित दखल घेऊन रस्ते सुरक्षित करावेत, अशी मागणी केली आहे.
