मुंबई | प्रतिनिधी
आद्यक्रांतिवीर राजे उमाजी नाईक हुतात्मा स्मारक, मामलेदार कचेरी, पुणे येथील संपूर्ण परिसराला ऐतिहासिक स्थळ म्हणून घोषित करून शासनमान्यता देण्याबाबत मंत्रालयात महसूलमंत्र्यांच्या दालनात महत्त्वपूर्ण बैठक पार पडली.
बैठकीत स्मारकाच्या ऐतिहासिक महत्त्वावर सविस्तर चर्चा करण्यात आली. परिसराला ऐतिहासिक दर्जा देण्यासाठी आवश्यक कार्यवाही, प्रस्तावाची प्रक्रिया आणि शासनस्तरावरील पुढील टप्प्यांबाबत सकारात्मक विचारविनिमय झाला.
यावेळी संबंधित विभागाकडून सविस्तर अहवाल तयार करून लवकरच पुढील बैठक आयोजित करण्याचा निर्णय घेण्यात आला. तसेच महसूलमंत्री चंद्रकांत बावनकुळे यांनी संबंधित अधिकाऱ्यांना आवश्यक कार्यवाही करून अहवाल सादर करण्याच्या सूचना दिल्या.
या बैठकीला आद्यक्रांतिवीर राजे उमाजी नाईक हुतात्मा स्मारकाच्या शिष्टमंडळातील अध्यक्ष आप्पासाहेब चव्हाण, दीपक नागपुरे, भूपेंद्र मुजुमदार, गणेश शिवाजीराव पाटोळे, कृष्णा भंडलकर आणि सुनील शिवाजी जाधव उपस्थित होते.
स्मारकाला ऐतिहासिक दर्जा मिळवून देण्यासाठी शासन स्तरावर सकारात्मक हालचाली सुरू झाल्याने समाजामध्ये समाधानाचे वातावरण असून, लवकरच याबाबत अनुकूल निर्णय होईल, अशी अपेक्षा शिष्टमंडळाने व्यक्त केली.
