माळशिरस | प्रतिनिधी
सोलापूर जिल्हा शिक्षक सहकारी पतसंस्था मर्यादित, बाळे यांच्या वतीने आयोजित वार्षिक पुरस्कार सोहळ्यात माळशिरस येथील क्रांतीज्योती सावित्रीबाई फुले माध्यमिक विद्यालय व सुशिलाबाई फरांदे कनिष्ठ महाविद्यालय यांना ‘सुंदर शाळा, स्वच्छ शाळा’ या प्रतिष्ठेच्या पुरस्काराने गौरविण्यात आले. हा पुरस्कार विद्यालयाच्या व्यवस्थापनाला प्रदान करण्यात आला.
शाळेच्या निवडीसाठी कॅम्पसची स्वच्छता, वृक्षारोपण, सुबक व्यवस्थापन तसेच विद्यार्थ्यांमध्ये रुजविण्यात आलेले स्वच्छतेचे संस्कार या विविध निकषांचा विचार करण्यात आला. या सर्व बाबींमध्ये उल्लेखनीय कामगिरी करत ‘क्रांतीज्योती’ विद्यालयाने हा मान पटकावला.
विद्यालयाला मिळालेला हा सन्मान मुख्याध्यापक, शिक्षक, शिक्षकेतर कर्मचारी आणि व्यवस्थापन समितीच्या सामूहिक प्रयत्नांचे फलित असल्याची भावना यावेळी व्यक्त करण्यात आली.
या यशाबद्दल विद्यालयाचे सर्व स्तरातून अभिनंदन होत असून, माळशिरस तालुक्याच्या शैक्षणिक क्षेत्रासाठी ही अभिमानाची बाब मानली जात आहे.
