शहापूरमध्ये मोफत हृदयरोग व व्हेरिकोज व्हेन्स तपासणी शिबिरास उत्स्फूर्त प्रतिसाद; शेकडो रुग्णांनी घेतला लाभ

शहापूर | प्रतिनिधी

शिवसेना (उद्धव बाळासाहेब ठाकरे) शहर शाखा शहापूर, युवासेना शहर शाखा शहापूर आणि अशोका मेडिकव्हर हॉस्पिटल, नाशिक यांच्या संयुक्त विद्यमाने शहापूर येथे मोफत हृदयरोग व व्हेरिकोज व्हेन्स तपासणी व उपचार शिबिराचे आयोजन करण्यात आले. कुणबी समाज हॉल, तहसील कार्यालयाजवळ आयोजित या शिबिराला शेकडो नागरिकांनी उत्स्फूर्त प्रतिसाद देत विविध आरोग्य तपासण्यांचा लाभ घेतला.

बुधवार (दि. ८ जुलै २०२६) रोजी सकाळी ११ ते दुपारी ३ या वेळेत पार पडलेल्या या शिबिरात मोफत हृदयरोग तपासणी, ईसीजी (ECG), डॉप्लर व व्हेरिकोज व्हेन्स तपासणी, कार्डिओलॉजिस्ट सल्ला, रक्त तपासणी तसेच थायरॉईड तपासणी करण्यात आली.

या शिबिरात डॉ. अमोल भालेकर आणि डॉ. एम. एस. अहिरे, इंटरव्हेन्शनल कार्डिओलॉजिस्ट (अशोका मेडिकव्हर हॉस्पिटल, नाशिक) यांनी नागरिकांची तपासणी करून आवश्यक वैद्यकीय मार्गदर्शन केले.

शिबिरात तपासणीदरम्यान शस्त्रक्रिया किंवा विशेष उपचारांची आवश्यकता असलेल्या रुग्णांवर शासनाच्या विविध योजनांद्वारे मोफत शस्त्रक्रिया व उपचार उपलब्ध करून देण्यात येणार असल्याची माहिती आयोजकांनी दिली.

हा सामाजिक उपक्रम शिवसेना शहरप्रमुख विजय देशमुख यांच्या मार्गदर्शनाखाली आयोजित करण्यात आला. “८० टक्के समाजकारण आणि २० टक्के राजकारण” या संकल्पनेतून नागरिकांच्या आरोग्यासाठी हा उपक्रम राबविण्यात आल्याचे आयोजकांनी सांगितले.

कार्यक्रमाला काशीनाथ तिवरे, तालुका प्रमुख बाळा धानके, राष्ट्रवादी काँग्रेसचे तालुकाध्यक्ष नंदकुमार मोगरे, रविंद्र लकडे, दत्ताशेठ ठाकरे, रश्मी निमसे, गुलाब भेरे, गणेश आवसरे, युवासेना तालुकाप्रमुख अतुल भालके, महेश दिनकर, रविंद्र खाडे, मधुकर वेखंडे तसेच विविध पक्षांचे पदाधिकारी आणि नागरिक उपस्थित होते.

कार्यक्रमाच्या यशस्वी आयोजनासाठी विजय देशमुख, युवासेना शहरप्रमुख हर्षद राऊत, सचिव बापू भोपतराव, उपशहरप्रमुख बाळा निमसे आणि सहकाऱ्यांनी विशेष परिश्रम घेतले.