नाशिक | प्रतिनिधी
नाशिक शहरात पोलिस असल्याचे भासवून काही भामट्यांनी एका व्यक्तीचे अपहरण करत तब्बल ७० लाख रुपयांची रोकड लंपास केल्याची धक्कादायक घटना उघडकीस आली आहे. या घटनेमुळे शहरात मोठी खळबळ उडाली असून, पोलिसांनी आरोपींचा शोध घेण्यासाठी विशेष पथके तयार करून तपास सुरू केला आहे.
प्राथमिक माहितीनुसार, आरोपींनी स्वतःला पोलीस असल्याचे सांगून संबंधित व्यक्तीला ताब्यात घेतल्याचा आव आणला. त्यानंतर त्याचे अपहरण करून त्याच्याकडील सुमारे ७० लाख रुपयांची रोकड लुटून आरोपी घटनास्थळावरून फरार झाले.
घटनेची माहिती मिळताच पोलिसांनी तातडीने तपासाची सूत्रे हाती घेत विविध पथके तयार केली असून, सीसीटीव्ही फुटेज तसेच अन्य तांत्रिक पुराव्यांच्या आधारे आरोपींचा शोध सुरू आहे.
या घटनेच्या पार्श्वभूमीवर नागरिकांनी अनोळखी व्यक्तींवर सहज विश्वास ठेवू नये तसेच पोलीस असल्याचा दावा करणाऱ्या व्यक्तींची ओळख खात्री करूनच सहकार्य करावे, असे आवाहन पोलिसांनी केले आहे.
